Atividade traballadór iha estrada dirasaun aldeia Raifun ba Ritabou, munisípiu Maliana, segunda (4/12). Imajen TATOLI/António Gonçalves

DILI, 30 dezembru 2021 (TATOLI)–Ministériu Obra Públika (MOP) ezekuta ona Orsamentu Jerál Estadu (OJE) 2021 ho montante $224.840.129,21, ne’ebé reprezenta 95%, hosi totál alokasaun $234.511.942.

“Ezekusaun atuál $207.322.652,88 ka reprezenta 88,4%, ne’ebé tau hamutuk obrigasaun no kompromisu ho totál ezekusaun hamutuk $224.840.129,21 ka 95,9%,” relata nota ne’ebé Agência TATOLI asesu, kinta ne’e.

Hosi ezekusaun ne’e, prosesa ona pagamentu ho valór $54.746.681 ba projetu hamutuk 258, kompostu hosi projetu hosi liña ministériu hamutuk 99 ho valór $5.960.029 no projetu iha liña ministériu no Fundu Infraestrutura (FI) hamutuk 159 ho valór $48.786.652.

Notísia relevante: PN aprova orsamentu tinan 2022 ba MOP millaun $160

Aleinde ne’e, prosesa ona pagamentu ho valór $21.958.817 ba projetu 16 finansiadu hosi empréstimu.

Halo ona konkursu públiku ba projetu hamutuk 135 iha liña ministeriál ho valór kontratu $23.589.704, nune’e reseita ne’ebé akumula hamutuk $46.869.350, kompostu hosi reseita finanseira $39.938.467 no reseita naun-finanseira (poupansa) hamutuk $6.930.883.

Fonte reseita sira hosi Eletricidade de Timor-Leste, Empreza Públika (EDTL, E.P) $30.818.438 (66%),  Institutu Jestaun Ekipamentu, Institutu Públiku (IGE, I.P, sigla portugés) $7.868.321 (17%), Bee Timor-Leste, Empreza Públika (BTL, E.P) $207.000 (0,44%), Diresaun Nasionál Planu no Dezenvolvimentu $84.000 (0,18%), no  Direasaun Nasionál Aprovizionamentu (DNA) $22.000 (0,05%).

Estrada, ponte no kontrolu cheias

Hosi totál projetu 137, alistadu no orsamentadu iha liña ministériál, projetu estrada rurál 91 ne’ebé loke konkursu no implementa ona hamutuk projetu 46 no seluk Ajénsia Dezenvolvimentu Nasionál (ADN) sei verifika hela no sei iha preparasaun no adjustamentu dezeñu no Bill of Quantity (BoQ).

Hosi totál projetu 114 alistadu no orsamentadu iha FI, kompostu hosi estrada rurál 44 ho distánsia kilómetru 92, loke ona konkursu no falta projetu 70 seluk maka ADN verifika hela no hein aprovasaun hosi Konsellu Administrasaun Fundu Infraestrutura (KAFI) halo preparasaun no adjustamentu dezeñu no BoQ.

Dezeñu detalladu ba estrada munisipál pakote 12 no ponte pakote 10 finaliza no submete ona ba ADN hodi halo verifikasaun no KAFI aprova molok avansa ba konkursu públiku no implementasaun.

Nune’e, estrada munisipál 12, kompostu hosi Aileu Jct-Gleno Jct, Aileu-Liquidoe, Laga-Baguia, Manatuto Jct-Soibada, Manatuto-Laclo, Alas-Wedaberek, Turiscai-Alas, Uaica-Quelicai-Ossu villa, Uatulari-Laisurulai, Luca-Lacluta, Bobonaro Jct-Lolotoe no estrada urbana Maliana, extra Estrada Urbana Baucau.

Ponte 10, kompostu hosi Ponte Samalari (Laga-Baguia), Ponte Sana (Uatulari-Laisurulai), Ponte Sumako (Lacluta Uma Tolu), Ponte Maloa 5 (Matadouro RTK), Ponte Comoro Mota Ulun (Dili-Aileu), Ponte Tutuluru (Same), Ponte Suco Liurai (Aileu-Liquidoe), Ponte Maubara 1 (Liquicá), Ponte Bera Railaco (Railaco Kraik-Leten) no Ponte Sanfuk (Suai).

TOR supervizaun ba estrada no ponte submete ona ba ADN hodi verifika no hein aprovasaun KAFI.

Enkuantu, projetu 16 finansiadu hosi empréstimu, projetu sia mak kompleta ona hanesan estrada Dili-Manatuto-Baucau ne’ebé superviziona husi timor-oan MOP, 3 ho progresu 80% ba leten no 4 ho progresu menus husi 50%.

Proposta konstrusaun estrada, estudu no dezeñu detalladu submete ona ba Banku Dezenvolvimentu Aziátiku (ADB, sigla inglés) no Banku Mundiál.

Finansiamentu ba Sesaun Hatubuiliku-Letefoho-Gleno efetivu ona iha outubru 2021, prosesu tomak ba estrada kuatru vias Rotunda Prezidente Nicolau Lobato-Tasitolu finaliza ona, aprova ona hosi Konselu Ministru no hein no objection hosi ADB molok avansa ba aprovizionamentu, aprovizionamentu ba ponte 3 (Seiçal, Borouai no Malailada) sei hala’o iha tempu badak no pedidu hato’o ona ba ADB ba estudu no dezeñu Ponte Lamara.

Orsamentu ba estrada Lautém–Com no Lautém–Lospalos tau ona iha OJE 2022,

Proposta estudu viabilidade no dezeñu detalladu ba estradaa Viqueque-Natarbora, Jct Aitutu-Hatubilico, Batugade-Balibo-Maliana, Maliana-Oeleu-Fatululik-Fatumean-Tilomar-Wemassa (Fronteira) hato’o ona ba ADB no Banku Mundiál, ho totál projetu ongoing iha liña ministeriál hamutuk 308 no FI hamutuk 702.

MOP iha Diresaun Jerál Administrasaun no Finansaa (DJAF) Diresaun Jerál Obra Públika (DJOP), no Diresaun Jerál Habitasaun no Urbanizmu (DJHU).

Aleinde ne’e, iha mós ajénsia autónomu sira ne’ebé tutela ba MOP hanesan EDTL, E.P, BTL, E.P, Autoridade Nasionál Eletrisidade, Institutu Públiku (ANE, I.P), Autoridade Nasionál Água no Saneamentu, Institutu Públiku (ANAS, I.P), no IGE, I.P.

Kompeténsi MOP hanesan departamentu governamentál ne’ebé responsável ba konseisaun, ezekusaun, koordenasaun no avaliasaun polítika ba área obra públika, abitasaun no urbanizmu, abastesimentu, distribuisaun no jestaun água no saneamentu inklui eletrisidade.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here