Servisu Edukasaun Munisipál Baucau realiza enkontru avaliasaun anual no Natál hamutuk iha Vila Nova, kinta (30/12). Imajen Tatoli/Natalino Belo.

BAUCAU, 30 dezembru 2021 (TATOLI) – Servisu Munisipál Edukasaun Baucau realiza enkontru anuál ho diretiva ensinu eskolár hotu ho objetivu avalia serbisu durante tinan 2021 nian.

Diretór Servisu Edukasaun Munisípiu Baucau, Augusto Hornai Ximenes, hateten, enkontru refere atu haree frakeza sira-ne’ebé mak durante ne’e no implementa hanesan programa iha tinan-2021.

“Tinan-tinan ita halo reuniaun haree ita-nia serbisu ne’ebé iha, liuliu dezafiu ne’ebé ita enfrenta,” Diretór Edukasaun Baucau hateten iha Vila Nova, kinta ne’e.

Liuhosi enkontru avaliasaun anuál sei sai baze ba Servisu Edukasaun Munisipál atu identifika kona-ba problema no preokupasaun kada eskola nian nune’e hato’o ba Ministéru Edukasaun, Juventude no Despostu (MEJD).

Avaliasaun anuál refere maioria diretiva eskola sira kestiona kona-ba situasaun pandemia Covid-19 ne’ebé fó impkatu ba prosesu aprendizajen la’o la normál.

Nune’e, liuhosi enkontru ne’e rekomenda ba MEJD no Ministéiru da Saúde (MS) atu prosesu aprendizajen la’o normál iha tinan 2022.

Nune’e mós diretiva sira kestiona mós kargu ne’ebé diretór eskola ne’ebé remata ona maibé seidauk iha desizaun klaru hosi parte ministériu.

“Balun hahú iha tinan-2011 to’o ohin loron la troka, ida-ne’e mak sai preokupasaun iha kada enkontru regulár, sira sempre aprezenta mai, maibé ministériu seidauk fó orientasaun,” Augusto akresenta.

Koordenadór Eskola Sekundária Jerál Dom Cárlos Filipe Belo, Afaça, postu administrative Quelicai, Carlos Ximenes apresia ho enkontru avaliasaun maibé prekupasaun ne’ebé hato’o to’o agora seidauk iha resposta.

“Maibé problema ne’ebé mak ami sempre hato’o seidauk responde, hanesan, iha ami-nia eskola seidauk iha komputadór ba estudante sira,” Carlos lamenta.

Entretantu enkontru avaliasaun ne’e hala’o mós Natál no tinan foun ne’ebé partisipa hosi Prezidente Autoridade Munisípiu Baucau, Olívio ‘Bou-Lesa’ Freitas.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here