Seremónia judisium ba profesór na’in-101 ho grau akadémiku baxarelatu, iha salaun Tilou Viqueque villa, kuarta (29/12). Imajen TATOLI/Vitorino Lopes da Costa

VIQUEQUE, 29 dezembru 2021 (TATOLI)—Profesór na’in-101 hosi munisípiu Viqueque partisipa judisium ba grau akadémiku baxarelatu, ne’ebé realiza hosi Universidade Nasional Timor-Lorosa’e (UNTL).

Tuir Vise-Ministru Edukasaun Juventude no Desportu (MEJD), António Guterres, prosesu estudu tomak la’ós fasil, maibé la’ós obstákulu ba hirak ne’ebé iha vontade atu aprende.

“Ohin profesór kontradu hamutuk na’in-101 simu baxarelatu, atu hetan ida-ne’e la’ós fasil tanba ita boot sira iha aten brani duni enfrenta dezafiu to’o hotu. Nune’e, rezultadu ikus ba prosesu tomak, ohin ita hotu hamriik iha ne’e hodi asiste judisium baxarelatu iha área edukasaun,” Vise-Ministru hateten ba Agência TATOLI, iha seremónia judisium, iha salaun Tilou Viqueque villa, kuarta ne’e.

Notísia relevante: UNTL-INFORDEPE realiza judisium ba profesór baxarelatu 1.500 iha munisípiu hitu

MEJD no INFORDEPE halo esforsu hotu, ho parseria UNTL hodi tulun profesór kontratadu sira bele eleva kualidade no kualifikasaun nu’udar edukadór iha Ensinu Báziku no Pre-Eskolár.

“Ita hotu komprimenta ba Lei Baze Edukasaun númeru 14/2008, 29 outubru no kuadru kompeténsia profesór Timor-Leste no kuadru kompeténsia obrigatóriu, katak profesór sira tenki domina lian, koñesimentu tékniku, ensinu aprendizajen no profisionalizmu. Tanba ne’e, durante tinan-tolu ita halo kooperasaun maka’as ho UNTL atu mobiliza rekursu hotu hodi apoia no fasilita ita boot sira-nia estudu hodi serví di’ak liután ita-nia sistema edukativa ho kualidade,” governante ne’e akresenta.

Vise-Ministru husu Viqueque-oan sira atu fila ba eskola ida-idak hodi hanorin no eduka oan sira rasik.

“Komunidade edukativa iha Viqueque sei hein ita boot sira,” nia enkoraja.

Iha fatin hanesan, Reprezentante Dekanu Fakuldade Edukasaun Arte Umanidade (FEAH, sigla portugés) hosi UNTL, Lorenço Marques da Silva, hateten, finalista sira simu sertifikadu mak foin kontinua lisensiatura, ne’ebé liuhosi kooperasaun Ministériu Edukasaun Juventude no Desportu, Instituto Nacional de Formação de Docentes e Profissionais da Educação de Timor-Leste (INFORDEPE) no UNTL.

“Nune’e, profesór sira ne’ebé simu baxarelatu ne’e seidauk hotu no sei iha kontinuasaun tanba dalan ba sira sei nakloke hela hodi hasa’e koñesimentu di’ak liután,” Vise-Ministru dehan.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here