Kondisaun ponte Lomea iha postu administrativu Zumalai, munisípiu Covalima. Imajen Tatoli/Celestina Teles.

COVALIMA, 29 dezembru 2021 (TATOLI)—Kondisaun Ponte Lomea ne’ebè lokaliza, iha Suku Tashilin, Postu Administrativu Zumalai, Munisípiu Covalima ameasa movimentu transporte públiku no ai-riin eletrisidade tanba kondisaun ponte sorin-balun atu besik kotu ona. 

“Ita haree kondisaun ponte refere sorin kotu ona no karreta lori sasán todan labele liu ona. Motor de’it mak belé liu maibé mós fó ameasa tanba ponte sorin kotu tiha ona no hela sorin-balun mak belit-metin iha ponte refere,” Komunidade Suku Tashilin, Mário Mendonça, informa ba Agência Tatoli iha Suku Tashilin, postu administrativu Zumalai, kuarta ne’e. 

Tanba ne’e. nia husu ba ministériu kompetente atu halo normalizasaun ba ponte ne’e, tanba ponte refere aleinde fó ameasa ba movimentu transporte públiku maibé ameasa mós ba ai-riin eletrisidade ne’ebé bee-mota atu lori tanba bainhira udan ne’e bee-mota sulin ho volume boot.

Diretór Servisu Munisípal Obra Públiku Covalima, Alberto Cardoso klarifika katak ba kondisaun Ponte Lomea ne’e, nia parte haruka ona karta ba Nasionàl. 

“Karta ha’u haruka beibeik ona no foin lalais iha natál hamutuk ha’u koalia ho diretór jeral no diretór Nasionàl, maibé bainhira ponte atu kotu ona Institutu Jestaun Ekipamentu (IGE, sigla portugés) sempre apoiu atu halo normalizasaun hodi hein,” nia informa. 

Tanba, nia fó razaun katak ponte ne’e hanesan grande projetu entaun ne’e depende hosi Ministériu Obra Públika (MOP) maibé hosi munisípiu hato’o informasaun ba nasional. 

“Kona-ba ponte ne’e, nia haruka karta hahú 2020 to’o ohin loron ita hein tanba bainhira atu kotu nia sempre fó apoiu. Foin lalais atu kotu loos ona sira sempre mai fó apoiu, nune’e komunidade sira bele halo movimentu,” diretór ne’e hateten. 

Kondisaun ponte la’os akontese iha munisípiu Covalima de’it maibé mós iha munisípiu sira seluk.

Obra Públiku Covalima laiha ekipamentu pezadu no hato’o ona informasaun atu koloka ekipamentu pezadu no agora ekipamentu Institutu Jestaun Ekipamentu (IGE, sigla portugés) iha hela Casa-Ainaro.

Jornalista : Celestina Teles

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here