Ministra Saúde, Odete Maria Freitas Belo ho Reprezentante Organizasaun Mundiál Saúde iha Timor-Leste, Arvind Mathur no Embaixadór Uniaun Europeia mai Timor-Leste, Ramon Reigada, inagura Uma Deskansa ba Família. Imajen/Média MS.

DILI, 29 dezembru 2021 (TATOLI)— Ministra Saúde, Odete Maria Freitas Belo ho Reprezentante Organizasaun Mundiál Saúde iha Timor-Leste, Arvind Mathur no Embaixadór Uniaun Europeia mai Timor-Leste, Ramon Reigada, inagura Uma Deskansa ba Família pasiente COVID-19.

OMS ho UE nafatin kontribui mai Timor-Leste iha ne’ebé konstrui tan ona fasilidade hanesan uma deskansa ba família pasiente iha Óspital Antonio Carvalho Lahane Díli. Konstrusaun ne’e nu’udar konstrusaun daruak husi OMS ho UE ne’ebé apoiu Ministériu Saúde ho montante orsamentu rihun $92.

Reprezentante Organizasaun Mundiál Saúde iha Timor Leste, Arvind Mathur hateten,akomodasaun ne’e atu suporta ba familia pasiente sira ne’ebé mak sira nia membru  hetan infesaun no hala’o tratamentu iha sentru saúde ida ne’e.

“Apoia ne’e, ami-nia kompromisu hodi fornese asisténsia téknika ho kualidade as, atu nune’e iha tinan 2022, ita bele hamutuk halakon Pandemia COVID-19 iha Timor-Leste,’’Reprezentante OMS ne’e, hateten liuhosi diskursu iha Hospitál Antonio Carvalho Lahane, kuarta ne’e.

Iha biban hanesan, Ministra Saúde, Odete Maria Freitas Belo, informa, agradese ba parseiru sira apoia ho uma rua, kompostu hosi  kuartu haat no kama hamutuk 32  ne’ebé bele fasilita ona família pasiente COVID-19,  ne’ebé hein iha ne’e.

“Ita hareee  fatin iha ospitál Lahane iha kama 25, maibé daudaun ho parseiru sira apoiu ho uma rua ho iha kama 32 kama  ba familia pasiente COVID-19,” Ministra agradese.

Ministra subliña tan katak MS nafatin tau importánsia atu família besik iha pasiente nian sorin, tanba Bainhira ema ida moras nia sei sente konfortavel liu kuandu ninia família besik, tanba ne’e kama hamutuk 32 ne’e sufisiente ona bainhira ministériu halo jestaun ho di’ak.

Jornalista : Felicidade Ximenes

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here