Ministru Ensinu Superiór Siénsia no Kultura, Longuinhos dos Santos. Imajen TATOLI/Francisco Sony

DILI, 29 dezembru 2021 (TATOLI)–Ministru Ensinu Superiór Siénsia no Kultura (MESSK), Longuinhos dos Santos, hateten, dadus estudante finalista 642 hosi Universidade Nasionál Timor-Lorosa’e (UNTL) ne’ebé atu simu graduasaun hetan ona omologasaun, maibé parte universidade mak adia.

“Reitór UNTL rasik mak hakarak adia tanba haree ba kestaun balun relasiona ho sira-nia preparasaun no tempu,” Ministru dehan  iha Palásiu Governu, kuarta ne’e.

Notísia relevante: Seremónia graduasaun UNTL adia ba 11 janeiru 2022

Ba kestaun ne’e, Ministru klarifika parte ministériu laiha problema bainhira maka UNTL atu realiza seremónia graduasaun, tanba administrativamente dadus estudante finalista hetan ona apresiasaun.

“Signifika dadus estudante finalista hosi UNTL ne’ebé atu gradua ne’e hetan ona omologasaun no reforsa mós ho despaisu ministeriál hodi fó dalan hodi bele realiza graduasaun. Agora bainhira mak sira atu halo graduasaun ne’e polítika universidade nian,” governante ne’e akresenta.

Enkuantu, Vise-Reitór UNTL ne’ebé trata asuntu Akadémiku no Garantia Kualidade, Samuel Venâncio de Sousa Freitas, konfirma, parte universidade simu ona despaisu hosi ministériu iha loron 23 dezembru 2021, hodi hateten katak dadus ne’ebé universidade haruka ba MESSK, halo ona verifikasaun no universidade bele realiza ninia graduasaun iha tempu saida de’it.

“Despaisu ba seremónia gradusaun ne’e mak to’o tarde, maibé iha hela prosesu nia laran, ita simu iha 23 dezembru. Konsidera tempu limitadu ona, tanba ne’e universidade deside adia ba 11 janeiru 2022,” nia dehan.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here