Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen Tatoli/Egas Cristovão.

DILI, 29 dezembru 2021 (TATOLI)—Ministériu Asuntu Parlamentár no Komunikasaun Sosiál (MAPKOMS), kuarta ne’e, hala’o sorumutu no halo diálogu ho mídia-na’in sira hodi halo diskusaun kona-ba kooperasaun iha ãmbitu “Kooperasaun servisu ba publikasaun informasaun”.

“Dialógu ohin ne’ebé halo ho mídia-na’in ne’e ho objetivu atu partilla informasaun ba malu, liu-liu hosi parte MAPKOMS ni’an ne’ebé halo. Aleinde ne’e husu informasaun hosi mídia-na’in, depois ita buka solusaun oinsá haree fila-fali ba iha tinan oin. Ba buat ne’ebé presiza hadi’a, ita hadi’a no buat ne’ebé di’ak ona, ita kontinua,” Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hateten ba jornalista sira iha Salaun Sentru Nasionál Empregu no Formasaun Profesionál (CNEFP), Tibar, Liquiça.

Divulgasaun informasaun ne’ebé mídia-na’in sira durante halo ne’e di’ak ona, tanba MAPKOMS no mídia-na’in sira iha komunikasaun ne’ebé di’ak hodi dezenvolve mídia iha futuru.

Governante ne’e fó hanoin ba mídia-na’in sira, bainhira sira iha difikuldade ruma mak MAPKOMS sei hamutuk nafatin ho sira hodi bele fó solusaun, nune’e mídia iha Timor-Leste ne’e bele buras.

“Governu sei buka solusaun, oinsá buka dalan di’ak liu ba mídia sira bele sustentavél,” nia dehan.

Mídia Lafaek News nia na’in, Acacio Pinto, hateten atividade ne’ebé MAPKOMS realiza ne’e di’ak tebes, tanba Governu liuhosi MAPKOMS hatene sira-nia parseriu mak mídia sira-ne’ebé eziste iha Timor mak hanesan mídia emprime, eletrónika no online.

“Atividade ne’e importante, tanba bele rona opiniaun direta hosi mídia-na’in sira no mídia-na’in sira mós rona direta opiniaun polítika Governu liuhosi MAPKOMS no SEKOMS, oinsá atu bele iha ligasaun ba malu. Tanba, ohin, ita rona katak sira dala barak servisu hamutuk ho rádiu komunidade sira, oinsá bele liga ho rádiu komunidade mai nasionál no hosi nasionál no oinsá liga ho rádiu komunidade ho informasaun sira-ne’ebé bele to’o iha baze. Ida-ne’e parte importante ida-ne’ebé di’ak ba mídia sira,” nia dehan.

Entretantu, iha sorumutu ne’e partisipa hosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, mídia-na’in sira, Embaixadór Repúblika Indonézia ba Timor-Leste, Okto Dorinus Manik, Prezidente Konsellu Diretivu Agência Tatoli, I.P, Manuel Pinto no funsionáriu MAPKOMS.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here