Autoridade lokál no parte seguransa fahe prémiu ba manan-na’in kompetisaun iha Bairru Belula, kuarta (29/12). Imajen TATOLI/Vitorino Lopes da Costa

VIQUEQUE, 29 dezembru 2021 (TATOLI)—Joven hosi Bairru Belula, suku Makadique, postu Uatulari, munisípiu Viqueque, ho inisiativa, realiza kompetisaun diskursu públiku no sertame ba estudante Makadique sira.

“Ami ho inisiativa rasik loke kompetisaun rua, ho objetivu atu hakbiit no hasa’e koñesimentu estudante Makadique oan sira,” Prezidente Komisaun, Bendito Cabaral Lemos, hateten ba Agência TATOLI, hafoin ramata entrega prémiu ba manan-na’in sira, Bairru Belula, kuarta ne’e.

Atividade kompetisaun realiza durante loron rua, hahú loron 28 to’o 29 dezembru 2021, ne’ebé partisipa hosi Xefe aldeia sira iha Makadique, membru PNTL Eskuadra Uatulari, Veteranu sira inklui komunidade suku Makadique.

Kompetisaun ne’e  realiza ho tema ‘Haburas no eleva koñesimentu estudante Belula ba futuru’.

“Estudante sira iha bairru ne’e kompostu hosi aldeia Betulari, Lutu-gia no Lau-uma. Ami-nia estudante hosi pre-sekundáriu no sekundáriu, ne’ebé hela iha Bairru Belula partisipa iha sertame no estudante universitáriu Belula maka partisipa iha diskursu,” nia akresenta.

Prémiu ba kompetisaun ne’e mak hanesan kadernu no sertifikadu.

“Ami sente prémiu la’ós importante, maibé koñesimentu maka sai fatór importante hodi eleva estudante sira koñesimentu no mentalidade,” nia tenik.

Iha fatin hanesan, Xefe suku Makadique, Afonso dos Reis Perlemos, agradese ba joven tanba iha ona inisiativa di’ak atu realiza kompetisaun ba estudante sira.

“Sira konsege muda hahalok sira. Ha’u agradese tebes ba joven sira hosi parte Belula ne’ebé ho inisiativa kria kompetisaun ba estudante sira, tanba uluk bairru ne’e kria beibeik konflitu, maibé agora sira muda ona karater. Nune’e, sira hamosu fali konseitu hodi loke kompetisaun ba estudante sira,” nia apresia.

Biban ne’e, líder komunitáriu husu joven Makadique atu kria nafatin atividade sira no parte autoridade sei apoiu tomak ba inisiativa joven sira.

“Ha’u sempre apoiu tomak kompetisaun ne’ebé Bairru Belula foin dahuluk loke iha suku Makadique. Tanba ne’e, ha’u husu nafatin loke kompetisaun hanesan sertame, diskursu no debate,” nia dehan.

Nune’e mós, Komadante Polísia Nasionál Timor Leste (PNTL) Inspetór Polísia, Afonso da Silva, konsidera kompetisaun iha área edukasaun importante tebes ba estudante hodi eleva koñesimentu no hosi parte PNTL seguransa iha postu Uatulari.

“Liuhosi edukasaun ita bele halo dezenvolvimentu ba ita-nia rain,” nia subliña.

Jornalista : Vitorino Lopes da Costa

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here