Primeiru Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (29/12). Imajen TATOLI/Francisco Sony

DILI, 29 dezembru 2021 (TATOLI)—Governu liuhosi reuniaun Konsellu Ministru (KM) aprova proposta ba prorrogasaun prazu depózitu provizaun, ba kompartisipasaun Estadu iha ámbitu akordu espesiál investimentu, ne’ebé halo ona ho TL-Cement, Lda, to’o loron 31 dezembru 2021.

Proposta ne’e aprezenta hosi Ministru Koordenadór Asuntu Ekonómiku, Joaquim Amaral, no Ministru Petróleu no Minerál, Víctor da Conceição Soares.

“Governu partisipa iha projetu TL-Cement no rai osan millaun $50 atubele finansia projetu, ne’ebé projetu ne’e tinan oin mak hahú. Entaun Governu deside atu estende tan osan ne’ebé rai hela iha konta bankária atubele finansia projetu bainhira hahú,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu, kuarta ne’e.

Notísia relevante: Governu hein rezultadu auditoriu TdC molok kontinua projetu TL-Cement

Akordu espesiál investimentu entre parte rua hala’o ona iha loron 17 maiu 2016, hafoin liuhosi Rezolusaun Governu númeru 41/2016, loron 23 novembru, aprova partisipasaun Estadu Timor-Leste iha sosiedade komersiál ne’e.

Iha loron hanesan, parte sira halo kontratu ida hodi aumenta kapitál no transforma sosiedade tuir kuota sai sosiedade anónima, hafoin kria konta bankária ne’ebé titulár hosi Autoridade Nasionál Petróleu no Minerál (ANPM) hodi garante fundu ba investimentu.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here