Vise-Dekanu FEAU-UNTL, Fernando da Conceição, hato’o nia diskursu iha serimónia judisium ba estudante finalista FEAU-UNTL iha Sentru Konvensaun Baucau, kuarta (29/12). Imajen Tatoli/Natalino Belo.

BAUCAU, 29 dezembru 2021 (TATOLI) – Estudante finalista hosi Institutu Nasionál Formasaun Dosente no Profisionál (INFORDEPE) hamutuk na’in-248 hala’o judisium iha Fakuldade Edukasaun Arte no Umanidade (FEAU), Universidade Nasionál Timor Lorosa’e (UNTL) iha Baucau.

Dekana FEAU-UNTL, Ana Cristina Martins, hateten, finalista hirak-ne’e hala’o estadu durante tinan-tolu antes sai profesór.

“Serimónia ne’ebé akontese dala-ida de’it iha vida akadémika universitária ka instituisaun akadémika ida bainhira estudante ida hahú estudu iha tinan naruk laran, ikus mai halo tuir hodi kumpri ezijénsia kritéria akadémika ne’ebé mak establese ona iha universitária ida,” Ana Cristina ko’alia iha Sentru Konvensaun Baucau (CCB, sigla Portugés), kuarta ne’e.

Nune’e estudante ida iha direitu atu simu atribusaun ba títulu akadémiku baixarelatu hosi FEAU-UNTL liuhosi despaixu dekana.

FEAU mak únika fakuldade hosi UNTL ne’ebé hetan konfiansa hosi Ministériu Edukasaun, Juventude no Desportu (MEJD) liuhosi INFORDEPE hodi realiza kooperasaun iha tinan 2018 hodi fó formasaun ba profesór kontratadu sira liuhosi departamentu formasaun profesór hodi hariku-aan ho siénsia.

“Ida-ne’e hatudu pasu pozitivu no hanoin di’ak hosi MEJD liuhosi INFORDEPE hodi hala’o kooperasaun atu hanoin profesór kontratadu nian ihafuturu,” Ana akresenta.

FEAU-UNTL iha tinan 2021 prodús estudante finalista hamutuk na’in-3.011 graduandu kompostu hosi estudante regulár 41, graduandu hosi online iha fulan-maiu hamutuk 191, fulan setembru-dezembru hamutuk 610.

Estudante estensaun ba grau baixarelatu hosi departamentu formasaun profesór hamutuk 2.575 hosi munisipál rua Ainaru no Manufahi hamutuk 481 ne’ebé hala’o judisium iha loron 8 dezembru 2021.

Nune’e munisípiu Liquiçá 108, Baucau 248, Viqueque 102, Aileu 69 no Manatuto 77 hamutuk judisiáriu 594.

Munisípiu neen seluk hamutuk 1.500 judisiáriu sei hala’o judisium iha janeiru 2022 kompostu hosi munisípiu Covalima 181, Bobonaro 429, Ermera 375, Lautem 89, Dili 244 no RAEOA 182.

Enkuantu FEAU-UNTL rasik rejista hahú hosi tinan 2003 to’o 2021 konsege prodús ona graduandu hamutuk 8.839.

Ministru Edukasaun Juventude no Desportu, Armindo Maia, hato’o parabéns ba finalista sira no husu atu kontinua aprende tanba hanesan profesór kada loron hanorin ba estudante sira nune’e kontinua asesu informasaun liuhosi meiu oinoin hanesan iha internete atu aumenta koñesimentu.

“La’ós iha universitária mak foin estuda maibé loron-loron estuda nafatin no nu’udar profesór ne’e ita-nia obrigasaun,” Ministru Armindo hateten.

Entretantu partisipa iha serimónia judisium ne’e kompostu hosi Prezidente Autoridade Munisípiu Baucau, Olivia ‘Bou-Lesa’ Freitas, Prezidente INFORDEPE, Ministru Armindo Maioa no família hosi judisiáriu sira.

Jornalista         : Natalino Belo

Editór               : Evaresto Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here