Xefe Estadu Maiór Jenerál F-FDTL, Tanente Jenerál Lere Anan Timur. Imajen TATOLI/Egas Cristovão.

DILI, 29 dezembru 2021—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, hateten Estadu halo esforsu atu halo forsa armada sira sai profisionál no hametin estabilidade instituisaun hodi kontribui ba dezenvolvimentu país nian ba ohin loron no iha futuru.

Lere Anan Timur hateten, iha enkontru ne’e sira ko’alia kona-ba estabilidade institusionál no oinsá militár bele sai profisionál liután liuhusi kumpre regra sira, dixiplina no rona ierarkia instituisaun.

“Estadu halo esforsu oinsá Forsa Armada sai profisionál no iha estabilidade institusionál,” Tenente Jenerál Lere Anan Timur, hateten liuhosi komunikadu imprensa ne’ebé Agência Tatoli asesu hosi Palásiu Prezidensiál Nicolau Lobato, Bairru Pite, Dili, kuarta ne’e.

Iha tinan 2021, FALINTIL-Forsa Defeza Timor-Leste kontribui mós ba estabilidade país nian no iha estabilidade instituisaun. 

F-FDTL kontinua hametin kooperasaun militár ho nasaun sira seluk, hanesan ezersísiu militár ho nasaun parseiru sira hosi Estadu Unidu Amerika, Australia no Nova Zelandia.

Maske nune’e, Xefe Estadu Maior Jenerál F-FDTL ne’e hato’o ninia preokupasaun kona-ba Forsa Armada nia nesesidade ne’ebé aumenta anualmente, maibé la refleta iha Orsamentu Jerál Estadu.

“Forsa Armada, tinan ba tinan, nesesidade sempre aumenta. Governu tenke dispoin orsamentu tenke korresponde ba nesesidade forsa armada nian. Pelu kontraria, Governu la halo ida-ne’e, en vez de orsamenta forsa armada, desorsamenta. Se tinan 2021 ne’e, orsamenta forsa armada nia. Millaun $20, tinan oin tenke liu ida-ne’e, tenke aumenta, tanba nesesidade aumenta. Governu tenke iha boa-vontade, vontade polítika atu dezenvolve Forsa Armada,” Tenente Jenerál ne’e hateten.

Aleinde ne’e, iha tinan ne’e F-FDTL rekruta tan membru efetivu na’in-600 no tinan oin sei aumenta tan 600.

Aumentu númeru efetivu sei implika ba nesesidade infraestrutura no lojístika, tanba ne’e Lere Anan Timur husu ba Governu fó prioridade ba F-FDTL no Polísia Nasionál Timor-Leste (PNTL) atu kontinua iha estabilidade no konfiansa.

Lere Anan Timur husu Governu atu kria kondisaun atu rekursu ne’ebé formadu iha área oioin bele hala’o nia funsaun tuir formasaun ne’ebé hetan tiha ona hosi nasaun oioin.

Maske F-FDTL iha ona nia pilotu rasik maibé Governu seidauk kria kondisaun, hanesan mós iha parte forsa naval ninian.

Nu’udar lider rezisténsia ida, Lere Anan Timur apela ba líder nasionál atu kontinua halo diálogu hodi buka konsensu lori nasaun ba oin.

“Konsensu, diálogu atu lori nasaun ba oin. Tinan lima mai ne’e, ultimu oportunidade ba ami katuas sira. Apela ba líder sira hotu, bele  aproveita tinan lima ikus ne’e, 2022-2027, lori jerasaun foun tuir dalan di’ak, dalan loos ba oin,” nota imprensa ne’e hateten.

Jornalista : Nelson de Sousa

Editór       : Cancio Ximenes

PUBLISIDADEiklan

1 KOMENTÁRIU

  1. Kondisaun importante ida maka labele rekruta membru husi GAM sira be uluk Governu bandu. Tanba saida maka ha’u dehan hanesan ne’e? Tanba orsida bele mosu konflitu interese. Exemplu ita bele haree daudaun iha instituisaun seguransa nian (Polísia).

HAKEREK NO HATÁN

Please enter your comment!
Please enter your name here