Membru organizasaun frente kaixa klandestina iha RAEOA partisipa iha konsolidasaun. Imajen Tatoli/Abílio Elo Nini.

OÉ-CUSSE, 29 dezembru 2021 (TATOLI) – Konfederasaun Unidade Organizasaun Kaixa Klandestina Timor-Leste, (CUOFCC-TL, sigla portugés) kuarta ne’e realiza konsolidasaun hodi re-organiza membru organizasaun rezisténsia frente kaixa klandestina atu fortifika estrutura munisipál hodi harii, hametin no haburas nune’e kontribui ba dezenvolvimentu nasionál.

CUOFCC-TL informa mós ba membru organizasaun sira iha RAEOA kona-ba ezisténsia no legalidade hosi Konferederasaun Unidade Organizasaun Kaixa Klandéstina Timor-Leste, ne’ebé públika ofisialmente iha Jornál Repúblika iha loron 11 fevereiru 2021 previstu iha númeru 06, seri II iha pájina 173.

Iha abertura konsolidasaun ne’e, loke hosi Adjuntu Prezidente Autoridade RAEOA, Maximiano Neno, ne’ebé reprezenta Prezidente Autoridade, husu ba organizasaun kaixa klandestina atu kontinua dezenvolve vizaun no misaun kaixa nian hodi sai ajente transformadór ba sosiedade hodi kontribui ba dezenvolvimentu nasionál.

“Uluk iha hotu luta, ohin ita luta ba dezenvolvimentu nasionál, ho ita-nia kontribuisaun bele tane aas interese nasionál hametin unidade pás no estabilidade, nune’e dezenvolvimentu la’o ba oin,” Maximiano Neno, ko’alia iha abertura konsolidasaun ne’e.

Prezidente Konfederasaun Organizasaun Kaixa Klandestina Nasionál, Tadeus Sebastião Sarmento de Deus, introdús esforsu kona-ba prosesu konfederasaun hosi inísiu to’o prosesu hetan legalidade.

Nia informa ba membru organizasaun klandestina sira-ne’ebé rejista iha RAEOA, atu mantein pás no estabilidade maske frente rua, frente armada ho frente diplomátika hetan ona rekoñesimentu hosi Estadu Timor-Leste.

Maibé daudaun ne’e konferederasaun kaixa klandestina esforsu ona atu tama ona iha prosesu legalidade iha tempu badak, nune’e Estadu bele rekoñese ona direitu organizasaun sira-nia luta iha luta rezisténsia nian.

“Iha era independénsia sempre hetan difikuldade iha prosesu verifikasaun dadús, entaun oinsá mak ita aposta situasaun sira-ne’e hodi rezolve situasaun oinoin, maka presiza unidade, harii konfederasaun hodi harii ezisténsia frente kaixa klandestina, nune’e hametin prosesu konfederasaun nian, atu haburas unidade atu alkansa ita-nia partisipasaun iha prosesu dezenvolvimentu nasionál,” nia katak.

Entretantu, tuir dadus ne’ebé Agência Tatoli asesu, organizasaun frente kaixa klandestina ne’ebé rejista iha RAEOA hamutuk 10 maka hanesan, Sagrada Família, Haok, Santo António, Orijumatil, Orgau 8, Unidade Nasionál, Haburas, Safari, Nove-Nove no Zero Um.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here