Agrikultór natar Holosa hahú halai ba époka dahuluk 2022 nian. Imajen Tatoli/Abílio Elo Nini.

OÉ-CUSSE, 29 dezembru 2021 (TATOLI) – Agrikultór natar Holosa ne’ebé lokaliza iha aldeia Manuimpena, suku Lalisuk, sub-rejiaun Pante Makasar, hahú halai natar ba époka tinan 2022 nian ho totál área hamutuk ektare 32.

Agrikultór, Marcelino Obe, informa, na’in agrikultór sira iha natar refere deside hahú halai natár ba époka dahuluk 2022 nian hodi aproveita udan-been, no garante volume bee hosi mota no bee-matan sira, sufisiente atu fó bee ba natar sira, tanba tuir kaléndariu sei kolleta iha fulan-abríl 2022.

“Agora nia tinan mak fulan ida-ne’e, tán ne’e maka ami hamutuk natar na’in hotu-hotu hahú halai, sei kuda iha inísiu janeiru 2022, no sei kolleta iha abríl, tanba tama to’o maiu ba leten ne’e atu halai ba faze daruak hanesan foin daudaun, ne’e depende hosi bee, kuandu sufisiente entaun ita halai tán ba dala-rua, mais ida-ne’e nia tinan, ami tenke halai agora,” Marcelino Obe, informa ba Agência Tatoli, iha suku Lalisuk, Oé-Cusse, kinta ne’e.

Agrikultór ne’e fó-sai katak, iha époka tinan 2021 hahú iha janieru natar Holosa abandona tanba impaktu udan-been menus, nune’e deside halai fali iha fulan-jullu, hafoin natar sira seluk kolleta tiha.

“Daudaun ne’e ami sei uza bee hosi hosi mota nia bee-udan, tanba bee hosi barajen Tono seidauk sufisiente atu kobre hotu natar sira hotu, tanba natar ne’e nia tinan mak ida-ne’e, entaun ami deside halai uluk, bainhira kolleta tiha ami hein fali bee restu hosi barajén Tono, kuandu barajen sufisiente entaun ami halai-tán ba dalarua, maibé depende fali hosi udan-been,” nia katak.

Xefe suku Lalisuk, Hermenegildo Lalisuk, hatete, iha suku Lalisuk la’os de’it natar Holosa maibé maioria agrikultór sira hahú halai natár ba époka tinan 2022 nian.

Agrikultor natar Holosá hahú kuda haree ba époka dahuluk 2022 nian. Imajen Tatoli/Abílio Elo Nini.

“Natar Holosa daudaun ne’e balu kuda no balu sei halai hela, depois natar sira Panite balu hahú prepara fini tuir planu iha 15 janeiru komesa kuda ona ba époka 2022,” líder lokál ne’e informa.

Entretantu, tuir dadús hosi Diresaun Rejionál Agrikultura RAEOA, liuhosi téknika estensionista suku Lalisuk, Marçelino da Rosa, informa agrikultór sira iha suku Lalisuk, liuliu iha natar Holosa daudaun ne’e balu kuda ona uza haree tipu membramo ba époka primeru tinan 2022, ne’ebé maioria uza téknika modernu nian ho sistema jajar legowo 2:1.

Notísia relevante: Agrikultór suku Lalisuk  foin hahú halai-natar  

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here