MAE sensibiliza prosedimentu prestasaun mellór relatóriu ba xefe suku sira iha RAEOA. Imajen Tatoli/Abílio Elo Nini.

OÉ-CUSSE, 28 dezembru 2021 (TATOLI) – Ministériu Administrasaun Estatál (MAE), tersa ne’e sensibiliza diploma ministeriál númeru 85/2021, 09 dezembru regula kona-ba prosedimentu prestasaun konta no mellór ba relatóriu ba autoridade lokál sira iha Rejiaun Administrativa Espesiál Oé-Cusse Ambeno (RAEOA).

Sensibilizasaun ne’e iha ámbitu insentivu estraórdináriu ba xefe suku sira iha Rejiaun Administrativa Espesiál Oé-Cusse Ambeno (RAEOA), ne’ebé previstu iha dekretu lei númeru 11/2021, 21 jullu.

“Sensibilizasaun ne’e ligadu ho pagamentu COVID-19 bainhira Governu halo pagamentu, entaun xefe suku sira presiza hatene prosedimentu bainhira simu insentivu oinsá halo relatóriu ba ministériu oinsá prenxe formuláriu, tanba fundu ne’e sei transfere direita ba konta bankária suku inklui konta bankária xefe suku sira-nian,” Sekretáriu Rejionál ba Asuntu Administrasaun, Martinho Abani Elu, informa ba Agência Tatoli iha Numbei, Oé-Cusse.

Nune’e aproveita semana ikus hosi tinan 2021 nian halo sensibilizasaun tanba tuir ajenda rezultadu sensiblizasaun tenke submete ba ministériu iha loron 10 janeiru 2022.

“Ita espera ho sensibilizasaun ne’e bele uniforme relatóriu hotu-hotu iha suku, tanba pagamentu ne’e sei la tama suku sai suku maibé koletivamente tanba orsamentu ne’e tranfere liuhosi transferénsia públika, entaun sensibilizasaun fó koñesimentu ba xefe suku sira hamutuk sekretária suku atu koñese modelu halo relatóriu,” nia katak.

Xefe suku Usitasa’e, Tomas Ulan Colo, agradese ba MAE tanba fasilita sensilizasaun ba prosedimentu prestasaun konta no mellór ba relatóriu, molok halo pagamentu ba subsídiu saida de’it, nune’e bele hatene oinsá hato’o relatóriu klaru no sistemátiku tuir padraun ministériu nian.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here