Diretór Prizaun Becora, João Domingos. Imajen TATOLI/Francisco Sony

DILI, 28 dezembru 2021 (TATOLI)–Diretór Nasionál Estabelesimentu Prizaun Becora, João Domingos, hateten, iha tinan ne’e nia laran prizaun simu dadur foun hamutuk 131.

“Rakapitulasaun hahú iha loron 01 janeiru to’o 26 dezembru, ita-nia maluk sira ne’ebé tama foun ba Prizaun Becora hamutuk 131 no hetan liberdade hamutuk 163,” Diretór Nasionál hateten, iha Prizaun Becora, tersa ne’e.

Antes ne’e, dadur sira iha Prizaun Becora hamutuk 554, maibé ikus mai tun ba 499, kompostu hosi prizaun kondenadu hamutuk 398 no prizaun preventiva hamutuk 101.

“Grasa Maromak nian, tinan ne’e foin akontese dahuluk, ema tama foun ba prizaun oituan no hetan liberdade mak barak. Espera tinan oin mai ne’e kontinua akontese hanesan ne’e,” nia akresenta.

Notísia relevante: MJ-MSSI selebra natál hamutuk dadur 499 iha Prizaun Becora

Tinan ne’e Prizaun Becora rejista prizioneiru na’in-haat mak lakon vida tanba moras komplikadu, fatór tinan, no COVID-19.

Maski nune’e, dadur sira ne’ebé daudaun iha Prizaun Becora, kumpre regulamentu prizaun, tanba ne’e ho prezensa Ministériu Justisa (MJ) no Ministériu Solidaridade Sosiál no Inkluzaun (MSSI) bele haree rasik ba maluk dadur sira-nia hahalok.

“Durante ne’e ita sempre eduka sira atu sai roman ba ema hotu, tanba hafoin kumpre hotu pena sei filafali ba sira-nia família,” nia akresenta.

Iha biban hanesan, Diretór Prizaun Becora, João Domingos, ne’ebé durante ne’e lori maluk prizioneiru sira halo julgamentu iha Tribunál Distritál Dili, Suai, Gleno inklui mós Rejiaun Administrativa Espesiál Oé-cusse Ambeno (RAEOA), hateten, daudaun ne’e guarda prizionál hamutuk 134.

“Maibé ba tinan ne’e ita lakon funsfionáriu guarda prizionál ida, ne’ebé foin lakon vida iha loron 24 dezembru, daudaun ne’e na’in-haat moras, na’in-rua baixa iha ospitál. Nain-rua maski moras maibé kontinua serbisu,” nia akresenta.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here