Ministériu Finansas, Komisaun Direitu ba Labarik no reprezentante UNICEF no Embaisadora hala'o lansamentu ba realatóriu "Situasaun Labarik Nian Iha Timor-Leste", tersa (28/12). Imajen Tatoli/Francisco Sony

DILI, 20 dezembru 2021 (TATOLI)— Governu liuhosi Ministru Finansa (MF) hamutuk ho Fundu Nasaun Unida ba Labarik (UNICEF, sigla inglés) no Komisaun Direitu Labarik (KDL) lansa relatóriu estudu analiza situasaun labarik iha Timor-Leste iha tinan 2020 no selebra aniversáriu UNICEF ba-dala-75.

Biban ne’e, Ministru Finansas, Rui Gomes hateten, relatóriu  ne’e hatudu analiza ida kona-ba situasaun atuál direitu labarik iha Timor-Leste no atu identifika dezafiu labarik sira ne’ebé hasoru ho sira nia família hodi elabora rekomendasaun prinsipál ba Governu no parseiru dezenvolvimentu sira.

Ministru Finansas, Rui Augostu Gomes. Imajen Tatoli/Francisco Sony

“Relatóriu analiza oferese evidénsia ne’ebé solidu no informasaun bázika ne’ebé sei tulun atu planeia no implementa inisiativa sira kona-ba realizasaun direitu labarik sira nian ne’ebé deskreve iha Planu Estratéjiku Dezenvolvimentu Nasionál Timor-Leste nian ba tinan 2011-2030 no Objetivu Deznevolvimentu Sustentavél (ODS) Nasaun Unida nian,” Ministru Finansa ne’e hateten iha ámbitu lansamentu relatóriu analiza ne’e, iha salaun MF-Aitarak-Laran, Dili, tersa ne’e.

Governante ne’e mós kongratula Fundu Nasaun Unida ba Labarik (UNICEF, sigla inglés) ne’ebé selebra nia aniversáriu ba dala-75 iha loron 11 dezembru liubá.

UNICEF hariu iha 11 dezembru 1946, hafoin funu segunda guerra mundiál remata kompostu hosi nasaun 191 iha mundu hodi fó protesaun ba labarik no seluk tan.

Iha fatin hanesan, Reprezentante UNICEF iha Timor-Leste, Bilal Aurang Zeb Durrani, hateten, estudu ne’e uza ba aprosimasaun setoriál ida atu analiza dadus no situasaun labarik sira nian inklui saúde, nutrisaun, bee, saneamentu no ijene edukasaun no protesaun ba labarik.

Rreprezentante UNICEF iha Timor-Leste, Bilal Aurang Zeb Durrani. Imajen Tatoli/Francisco Sony

“Relatóriu ne’e ajuda haklean liután komprensaun kona-ba dezafiu sira ne’ebé sira hasoru, nune’e mós oportunidade importante sira atu garante katak labarik sira bele moris no buras,” Bilal afirma.

Maski,  Timor-Leste hatudu ona progresu notavél iha tinan hira ikus ne’e, maibé iha buat barak, mak sei presiza investimentu no asaun signifikante ba labarik sira direitu ba sobrevivensia, nutrisaun, asesu ba saúde ou edukasaun no protesaun.

Entretantu, Komisária Komisaun Direitu Labarik (CDL-sigla Portugés), Dinora Granadeiro, hato’o agradese ba UNICEF ne’ebé halo ona estudu ne’ebé kle’an hodi analiza situasaun labarik nian iha Timor-Leste.

Komisária Komisaun Nasionál Diretu Labarik, Dinorah Granadeiro. Imajen TATOLI/Francisco Sony

“Analiza ida ne’e atu hakbiit liután labarik sira nia direitu, maibé ita tenke hala’o serbisu ne’ebé barak liután atu prevene no labele husik labarik sira iha kotuk,” Komisária ne’e afirma.

Lansamentu estudu ne’e, hatudu progresu ne’ebé di’ak atu hatene situasaun labarik sira nian iha área saúde, edukasaun, nutrisaun no seluk tan.

Tuir analiza situasaun ne’e hatudu Timor -Leste mak estadu illa ne’ebé dezenvolve hela hosi kedas tempu ne’ebé hetan fali independénsia iha 2002. Timor-Leste mak nasaun joven liu iha mundu independensia no demografia.

Hosi kedas independensia populasaun sa’e liu to’o um tersu hosi 955.000 no iha 2002 to’o 1.299.412, hafoin iha 2020 nudar rezultadu ba “baby boom” ne’ebé labarik sira idade tinan 0-17 kuaze metade 44% hosi populasaun Timor -Leste nian no adolescence (remaja) sira tinan 10-19 maizumenus un kuartu 24%.

Hosi analiza ne’e hatudu mós katak, taxa probreza aas liu iha labarik sira, kompara adultu sira ho labarik 47,8% ne’ebé moris iha liña probreza nasionál nia okos.

Jornalista : Hortencio Sanchez

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here