Xefe suku Dilor, Jacinto Ximenes. Imajen TATOLI/Vitorino Lopes da Costa

VIQUEQUE, 28 dezembru 2021 (TATOLI)-Komunidade hosi suku Dilor, postu administrativu Lacluta, munisípiu Viqueque, seidauk asesu bee-moos.

“Ha’u-nia komunidade suku Dilor durante ne’e seidauk asesu bee-moos, kestaun ne’e mak sai difikuldade boot ba suku ne’e, durante ne’e komunidade kuru bee iha mota maibé bainhira mota tun komunidade labele kuru bee,” Xefe suku, Jacinto Ximenes, hateten ba Agência TATOLI, iha salaun munisípiu Viqueque, tersa ne’e.

Aleinde ne’e, eletrisidade iha aldeia Moruk no Tula Holi iha suku Dilor hamutuk uma-kain 10.000 mak seidauk asesu ahi eletrisidade.

Nune’e, líder komunitáriu sira husu parte relevante atu tau atensaun ba komunidade nia halerik ba nesesidade bázika.

Notísia relevante: Austrália apoia BTL, E.P milliaun $4 hadi’a sistema bee-moos rua

“Ha’u husu ba komunidade, karik atu ba kuru bee iha mota karik, tenke kuidadu-an tanba agora tempu udan,” nia akresenta.

Suku Dilor iha aldeia lima, ho totál populasaun hamutuk na’in 30.217, hosi uma-kain 473.

Iha fatin seluk, Administradór munisípiu Viqueque, Januário Soares ‘Bolly’, hateten, orsamentu ba bee-moos prevee ona, maibé sei implementa iha tinan 2022.

“Munisípiu hetan orsamentu $6.000 atu responde ba kestaun bee-moos ne’ebé iha tinan oin ita sei halo identifikasaun ba komunidade ne’ebé seidauk asesu. Karik komunidade hosi suku ruma seidauk asesu bee-moos sira bele hato’o proposta mai munisípiu hodi ita haree,” Autoridade munisipál fó hanoin.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here