Foinsa'e Covalima dansa kultura Simu bainaka sira. Foto TATOLI: Rafy Belo.

COVALIMA, 28 dezembru 2021 (TATOLI)—Governu liuhosi Sekretària Estadu Arte no Kultura (SEAK), tersa ne’e, realiza kampaña nasionàl “Kultura Forte-Nasaun Metin” atu prezerva kultura orijinál iha Covalima. 

“Ita hatene, ohin loron, iha aldeia no suku mai iha munisípiu, ita la hanesan iha tempu Indonézia ho mala-mutin nia tempu. Ita nia kultura, likurai no tebe sira orijinál loloos mai husi  avó no katuas sira,  Ohin loron, komesa redús no atu lakon ba beibeik ona, entaun objetivu hosi kampaña ne’e atu prezerva kultura orijinál Timor-Leste nian ba nafatin,” Reprezentante Adminitradór Munisípiu Covalima, Francisco Mendonça, hatetetn liuhosi nia diskursu bainhira partisipa iha kampaña nasionàl kultura, iha salaun Uma Feto, Covalima.

Lia-na’in sira iha munisípiu Covalima partisipa iha atividade kampaña nasionàl “Kultura Forte-Nasaun Metin” iha Covalima. Imajen Tatoli /Celestina Teles.

Nia hateten, VIII Governu Kontituisionàl realiza kampaña nasionàl “Kultura Forte-Nasaun Metin” ida-ne’e, atu fó hanoin ba estudante no profesór sira iha kada eskola sempre hatudu kreatividade hodi hatudu dansa moderna ne’ebé tau sees tiha dansa tradisionál ne’ebé bei’ala sira husik hela.

“Governu preokupa hosi munisípiu sempre organiza atividade hanesan ne’e, no ohin grupu lubuk ida mai iha ne’e, sei prátika ita-nia tebe antiga no likurai sira atu prezerva no iha nafatin kontinuidade ba ita-nia jerasaun sira atu labele lakon,” nia informa.  

Ho eventu kampaña nasionàl ne’e atu salva kultura orijinàl Covalima nian labele lakon, se lae ho influénsia dansa moderna liu-liu dansa ne’ebè la’ó orijinàl Timor ni’an hamihis ona kultura orijinàl Timor-Leste nian. 

“Ema hosi Indonézia, hanesan hosi Betun (Atambua-Kupang) dahur tuir muzika, ita (timor-oan) lori mai hakarak halo tuir sai tebe-tebe ne’ebé ohin loron buras, atu hamate ita-nia kultura orijinál,” nia dehan. 

Bazea ba kultura orijinàl bei’ala sira dahur la’ós tuir múzika maibé dahur ho lian hananu de’it no baku likurai, maibé agora komunidade animadu dahur no tebe tuir múzika nia lian. 

Tanba ne’e, nia rekomenda atu kontinua realiza atividade kampaña Nasionàl ne’e hodi hamosu kompetisaun, nune’e atu relembre kultura orijinàl labele halakon influénsia hosi dansa moderna sira hodi hamihis no hamate Timor-Leste nia kultura orijinál.

Prezidente Komisaun G Parlamentu Nasionàl, António Verdial, agradese Governu liuhosi Sekretária Estadu Arte no Kultura (SEAK) realiza kampaña ansionál hodi fanu populasaun sira-nia konsiénsia atu prezerva Timor-Leste nia kultura loloos.

“Ha’u hato’o agradese no ha’u sei apoiu Sekretária Estadu Arte no Kultura hodi tau matan ba rai Covalima, espesiál postu administrativu hitu (7). Tanba uluk ha’u sei servisu iha ne’e, iha Maucatar seidauk sai postu administrativu,” nia reforsa.  

Agora Maucatar sai postu administrativu ne’e bainhira simu vizita hosi líder Nasionàl Kay Rala Xanana  Gusmão hodi hato’o ba Governu, to’o ikus deside Maucatar sai postu administrative iha Covalima. 

“Ita hato’o agradese ba líder Nasionàl Kay Rala Xanana Gusmão, bainhira hakat mai Covalima hodi hato’o ba Governu mak to’o ikus Maucatar sai postu administrative,” nia dehan.

Iha serimónia kampaña nasionàl ne’e hetan partisipasaun másimu lia-na’in sira hosi postu administrativu sira iha munisípiu Covalima hodi halo diskusaun ba kultura Cova-Lima no hatudu dansa orijinàl kultura Covalima nian.

Jornalista : Celestina Teles

Editór       : Cancio  Ximenes

PUBLISIDADEiklan

HAKEREK NO HATÁN

Please enter your comment!
Please enter your name here