Governu entrega família afetadu 04 abríl uma-kain 10 hela iha RAEOA. Imajen/mídia Sekretaria Administrasaun.

OÉ-CUSSE, 28 dezembru 2021 (TATOLI) – Sekretaria Estadu Protesaun Sivíl (SEPS), servisu hamutuk ho Ministériu Administrasaun Estatál (MAE) liuhosi autoridade munisipíu Díli, entrega família afetadu 04 abríl hamutuk uma kain-10 ba Rejiaun Administrativa Espesiál Oé-Cusse Ambeno (RAEOA).

Sekretáriu Rejionál ba Administrasaun, Martinho Abani Elu, ne’ebé reprezenta autoridade RAEOA, informa, família afetadu hirak-ne’e SEPS transporta hosi Dili ba Oé-Cusse iha kinta lokraik, hamutuk uma kain-10 ho família na’in-50.

Família hirak-ne’e mai hosi uma kain-ualu (8) hosi suku Taiboko, uma kain ida (1) hosi suku Bobokase perténse ba sub-rejiaun Pante Makasar no uma kain ida (1) hosi suku Bobometo, sub-rejiaun Oésilo.

Governu entrega família afetadu 04 abríl uma-kain 10 hela iha RAEOA. Imajen/mídia Sekretaria Administrasaun.

“SEPS serbisu hamutuk ho MAE, liuhosi autoridade munisipíu Díli maka mai entrega iha Oé-Cusse, tanba bazea desizaun hosi família sira hakarak fila mai ba sira-nia rai moris fatin, entaun Governu fasilita sira transporte inklui materiál konstrusaun apoiu sira mai hela iha Oé-Cusse,” Martinho Abani Elu, informa ba Agência Tatoli iha Numbei, Oé-Cusse, tersa ne’e.

Autoridade ne’e fó sai katak, akontesimentu dezastre naturais siklone tropikál seroja ne’ebé akontese iha loron 04 abríl 2021 liubá, estraga patrimóniu hotu-hotu, estraga sidade Dili, família barak tenke lakon sira-nia hela-fatin, balu lakon sira-nia vida, nune’e família barak mak tenke hela temporariamente iha lona okos hanesan refujiadu.

Tanba família barak mak refujia, entaun foin daudaun Governu Sentrál hasai opsaun tolu, dahuluk, fila ba munisipíu, daruak, hein desizaun Governu, datoluk bele hela nafatin iha Dili maibé tenke iha rai própriu.

“Entaun família uma kain-10 ne’e, hili opsaun daruak nian, ne’ebé deside fila mai Oé-Cusse, hodi kontinua atividade moris iha rai moris fatin,” nia fó-sai.

Adjuntu Prezidente Autoriedade Munisípiu Díli, António Moniz Calau, iha ámbitu entrega família afetadu hirak-ne’e, haktuir durante ne’e esforsu maka’as kona-ba oinsá atu trata kondisaun fatin no hela-fatin ba família afetadu hirak-ne’e ho dignu maibé depende hosi desizaun Governu.

Tán ne’e mak Autoriedade Munisipál Díli serbisu hamutuk ho Sekretáriu Estadu Protesaun Sivíl hamosu politíka rezolve problema hirak-ne’ebé mak família afetadu sira enfrenta.

Nune’e iha opsaun tolu ne’e mak Autoriedade Munisipál Díli ho Sekretaria Estadu Protesaun Sivíl fó-sai, nune’e Oé-Cusse oan balu deside fila-fali ba Oé-Cusse, maibé ho tratamentu dignu hosi Governu. Iha mós apoia umanitária hosi SEPS hanesan, ai-han no materiál konstrusaun kada uma-kain.

Materiál konstrusaun sira komposta hosi besi beton, simentu saka 50, Kalen tahan-50, pregu, arame. Nune’e ba ai-han nian komposta hosi fós, mie sedap, ikan lata, bee ákua, biskuit, susu-been inklui sasán dapur nian komposta hosi lona, biti no seluk-tán.

Entretantu, partisipasaun iha seremónia entrega ne’e mai hosi reprezentante autoridade RAEOA atuál Sekretáriu Rejionál Administrasaun, Martinho Abani Elu, Adjuntu Prezidente Autoridade Munisipíu Díli, António Moniz Calau, reprezentante SEPS, Jacob Tefa, pontu vokál protesaun sivíl RAEOA, ekipa SEPS, xefe suku Taiboko no família afetadu sira.

Jornalista         : Abílio Elo Nini
Editór               : Evaristo Soares Martins

 

PUBLISIDADEiklan

HAKEREK NO HATÁN

Please enter your comment!
Please enter your name here