Seremónia lansamentu Muzeu Memoriál Munisipál iha suku Bibileo, tersa (28/12). Imajen TATOLI/Vitorino Lopes da Costa

VIQUEQUE, 29 dezembru 2021 (TATOLI)–Sentru Nasionál Chega!, Institutu Públiku (CNC, I.P), tersa ne’e, lansa Muzeu Memoriál Munisipál iha suku Bibileo, postu administrativu Viqueque villa, munisípiu Viqueque.

“Ita lansa fatin ne’e atu prezerva memória  rezisténsia Viqueque. Memoriál ne’e ko’alia kona-ba fatin, ema, loron-boot sira, no luta ba ukun rasik-an,” Diretór Ezekutivu CNC, I.P, Hugo Maria Fernandes, hateten ba Agência TATOLI, iha Muzeu Memoriál Munisipál.

Desizaun harii fatin ne’e iha suku Bibileo, tanba haree ba Masakre Cararas, ne’ebé antes ne’e Governu mós harii jardín no osoáriu ba eroi sira.

Aleinde ne’e, suku Bibileo koñesidu ho levantamentu 07 agostu 1983, tanba ne’e sentru nasionál konsidera eventu boot sira presiza prezerva hodi hatutan memória ba jerasaun foun sira.

“Muzeu ne’e haktuir komunidade Viqueque ninia partisipasaun ba luta ukun-an. Nune’e, muzeu sai fonte ba jerasaun foun no sai inspirasaun ba jerasaun tuan sira. Ita-nia inan-aman sira ne’ebé kontribui ba luta ukun rasik-an ne’e, hakarak rai sasán sira antigu iha tempu rezisténsia nian laran iha muzeun, atu ema ne’ebé mai vizita bele haree,” nia akresenta.

Notísia relevante: Autoridade Viqueque realiza seremónia kulturál no misa molok lansa Muzeu Rezisténsia

Uma ba muzeu ne’e oferese  gratuita hosi sobrevivente, Julmira Soares, ba CNC, I.P, nune’e bele prezerva memória pasada.

“Iha tinan ne’e, ita uza provizóriu Señora Julmira ninia uma hanesan muzeu, ne’ebé parte sentru nasionál sei apoia funsionáriu iha Muzeu Memoriál Bibileo. Ami sei koordena ho Administradór munisípiu Viqueque hodi aloka orsamentu ba konstrusaun muzeu no agora ita lansa ne’e hanesan provizóriu, maibé tinan rua mai, ita sei halo konstrusaun muzeu foun,” nia tenik.

Muzeu ne’e iha sala rai livru no sasán rezisténsia ida inklui sala leitura ba vizitór, ne’ebé daudaun ne’e iha ona estrutura armada hosi rezisténsia munisípiu Viqueque tinan 1975 to’o 1999 no dokumentu antigu publika livru istória sira.

Iha fatin hanesan, Xefe suku Bibileo, Maria Odete dos Anjos, agradese ba CNC, I.P ne’ebé deside estabelese muzeu iha suku ne’e.

“La taka dalan ba ema hotu mai vizita muzeu ne’e tanba fatin ne’e nakloke ba ema hotu, liuliu estudante sira tenki asesu hodi bele hatene istória rezisténsia,” nia dehan. 

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here