Segundu Komandante PNTL Covalima, Superintendente Asistente Polisía, Albino Mauzinho (klaran). ImajenTatoli /Celestina Teles.

COVALIMA, 27 Dezembru 2021 (Tatoli)—Segundu Komandante Polísia Nasionál Timor-Leste (PNTL) Munisípiu Covalima, Superintendente Asistente Polísia, Albino Mauzinho informa durante selebra festa Natál, komandu PNTL la rejista kazu insidente no asidente iha Covalima.  

“Iha selebrasaun Natál tinan ida-ne’e, ita laiha asidente no insidente ne’ebè boot akontese iha ita-nia postu administrativu hitu (7) no munisípiu Covalima. Iha duni insidente kiik hanesan ema lanu maibé la afeta ba selebrasun ne’e,” Superintendente Asistente Polísia Albino Mauzino hateten ba jornalista sira, iha edifísiu komandu PNTL munisípiu Covalima, segunda ne’e. 

Antes ne’e, komandu PNTL hasai ona sirkulàr hodi fó mensajen ba autoridade postu administrativu no líder komuniktáriu sira hodi fó hatene ba komunidade ne’ebè selebra natàl labele hemu lanu iha iha fatin públiku, fatin determinadu hanesan fatin paseiu ba komunidade no labele hemu iha prezépiu ne’ebé prepara ba kosok-oan Jesus atu moris bá ne’e.

Durante selebra Natàl, joven sira hemu duni tua maibè sira la hemu iha fatin públiku maibé sira hakmatek festeza festa kosok-oan Jesus moris hodi hemu tua iha sira ida-idak nnia rezidénsia.

“Ita-nia joven sira hemu duni maibè sira la halo halo distúrbiu iha fatin públiku ka uza motorizada hodi halo sirkulasaun iha dalan públiku bainhira iha tempu lanu,” segundu komandante ne’e dehan. 

Tanba ne’e, Komandu PNTL munisípiu Covalima hato’o agradesimentu ba komunidade no husu atu mantein nafatin situasaun ne’e atu kontinua selebra tinan foun ho seguru no dame, maibé bainhira joven sira hemu lanu iha fatin públiku mak komandu PNTL sei la tolera.

Durante selebrasaun loron-boot Natál, autoridade seguransa hala’o seguransa konjunta, nune’e númeru membru PNTL natoon hodi asegura seguransa to’o iha igreja no kapela sira iha kada postu admnimintsrtativu hitu (7) iha Covalima.

“Ita-nia Ofisiál Polísia Suku (OPS), ita destaka hodi kontrola suku laran no mòs kapela ne’ebè pertense iha suku sira bele hala’o selebrasaun misa natál ho seguru no ho ambiente ne’ebè hakmatek tuir espetativa ema ida-idak nia fiar,” nia dehan. 

Iha selebrasaun natàl ne’e, autoridade seguransa hala’o seguransa konjunta kompostu hosi PNTL-UPM, UPF, BOP no F-FDTL hodi garante seguransa nomós halo koordenasaun ho instituisaun sira hanesan parte saúde, Cruz Vermelha Timor-Leste (CVTL) no Bombeiros hodi asegura movimentasaun sarani sira-nian.

PNTL autoriza tiru fogete selebra tinan foun

Entretantu, Superintendente Assistènte Polísia Albino Mauzihno informa, iha selebrasaun tinan foun ne’e Polísia Nasionál Timor-Leste (PNTL) munisípiu Covalima autoriza komunidade bele  tiru fogete hodi festeza selebrasaun loron-boot tinan foun iha 31 dezembru iha kalan fahe-rua.

“Atu selebra tinan foun, komandu PNTL só autoriza de’it ba iha ita-nia sarani, komunidade hosi relejiuan hotu-hotu iha Covalima, ita autoriza sunu fogete ita tempu kalan fahe-rua. Signifika katak iha tuku 00h00, ita simu tinan foun ne’ebé atu mai ne’e ita bele sunu fogete,” nia hateten.

Komandu PNTL Covalima autoriza de’it sunu fogete atu selebra loron boot sira, maibé la autoriza sunu fogete iha loron baibain no la autoriza sidadaun sira hatama fogete ho livre no lahó responsabilidade. 

“Ita-nia nasaun la autoriza ema hatama fogete mai iha Timor-Leste. Maibé, iha tempu sira liubá, ita haree ona katak iha ema ida-rua komesa sunu ona fogete. Entaun husi ne’e ita nota katak iha fogete ne’ebé espalla iha Timor-Leste. Tanba, ita hatene, tinan tuan atu ramata, ema hotu prepara an atu simu tinan foun ho domin,” nia dehan.

Jornalista : Celestina Teles

Editór       : Cancio  Ximenes

PUBLISIDADEiklan

HAKEREK NO HATÁN

Please enter your comment!
Please enter your name here