Komandante UPF, Superintendente Polísia Euclides Belo, entrega nesesidade bázika hosi Madre Alma ba komunidade iha área Badut-mean, Bobonaro. Imajen/MI

DILI, 26 dezembru 2021 (TATOLI)—Madre Alma ho inisiativa apoia nesesidade bázika hanesan prezente natál, liuhosi Unidade Patrullamentu Fronteira (UPF) ba komunidade ne’ebé merese duni atu hetan tulun iha área Badut-mean, aldeia Railuli, suku Cova, postu administrativu Balibo, munisipiu Bobonaro.

“Natál nu’udar tempu di’ak ida atu tulun malu maun-alin sira ne’ebé merese duni atu hetan apoiu. Entaun, oportunidade ne’e ha’u apresia no orgullu ba Madre Alma sira tanba halo karidade hodi oferese prezente natál hanesan foos no supermie ba maun-alin sira iha ne’e,” Komandante UPF, Superintendente Polísia Euclides Belo, hateten, liuhosi nota ne’ebé Agência TATOLI asesu, domingu ne’e.

Nune’e, Komandante UPF apresia tanba maski Madre sira serbisu iha vida espirituál, la manán osan, no la halo to’os no natar, maibé iha tempu defísil hanesan ne’e, ho fuan boot hola parte hodi ajuda povu iha área rurál.

Tuir Euclides, daudaun ne’e tanba dalan ba área Badut-mean kotu, tanba ne’e UPF halo patrullamentu la’o ain ho distánsia dook tebes.

“Dalan ba área Badut-mean provizóriu karreta labele liu tanba mota kiik-oan ne’ebé empreza responsável aterru bee lori tiha bá sorin, maibé tanba domin ne’ebé kle’an hosi Madre Alma sira ba komunidade kbiit laek iha área izoladu fronteira, mak bele fó apoiu ai-han liuhosi UPF, nune’e ami hatutan hela ba sira. Boas festas santu natál no ksolok tinan foun ba komunidade Badut-mean no agradese ba komunidade ne’ebé durante ne’e kolabora di’ak ho ami,” nia akresenta.

Jornalista : Natalino Costa

Editora       : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here