IGE, I.P halo hela normalizasaun estrada iha aldeia Fatuk-boot, suku Leo-lima, ne'ebe liga hosi postu administrativu Balibo bá Maliana villa, munisípiu Bobonaro, domingu (26/12). Imajen TATOLI/Sérgio da Cruz

BOBONARO, 26 dezembru 2021 (TATOLI)—Ekipa hosi Institutu Jestaun Ekipamentu, Institutu Publiku (IGE, I.P) no empreza kontinua normaliza rai halai no monu ba estrada área kilómetru 10 aldeia fatuk-boot, suku Leo-lima, ne’ebe liga hosi postu administrativu Balibo bá Maliana villa, munisípiu Bobonaro, ne’ebé akontese iha loron 24 dezembru lorokraik.

Xefe ekipa IGE, I.P rejiaun IV Maliana, Aguido Leto, hateten, posibilidade ohin (26/12) transporte publika no privada seidauk bele asesu dalan tanba ekipa foin kontinua fali halo normalizasaun iha terrenu, tanba horikalan (25/12) akontese udan boot halo rai kontinua monu taka metin estrada.

Xefe ekipa IGE, I.P rejiaun IV Maliana, Aguido Leto. Imajen TATOLI/Sérgio da Cruz

“Ohin dadeer kedas ami halo normalizasaun, maibé volume serbisu aumenta tamba rai kontinua monu no taka metin, tanba ne’e posibilidade ohin labele ultrapasa no orsida ekipamentu mai tan, maibé aban ka bainrua ita bele asesu bá mai ona,” Xefe ekipa IGE, I.P, informa ba Agência TATOLI, iha lokál akontesimentu rai halai, domingu ne’e.

Notísia relevante: Xefe suku Leo-lima husu IGE normaliza estrada Balibo-Maliana

Normalizasaun ne’e hetan mós apoiu hosi obra públika rejionál munisípiu Bobonaro inklui empreza lokál nia mákina eskavatór.

Atu garante transporte públika no privada asesu lalais estrada, IGE, I.P hosi nasionál mobiliza ona ekipamentu bulldozer ida no reforsa tan loader ida iha Maliana hodi raut tahu sira, nune’e bele fasilita movimentasaun komunidade bá mai.

“Maski ekipamentu preparadu, maibé posibilidade sei kontinua labele asesu ho di’ak hanesan baibain, tamba rai nafatin monu ho volume maka’as bainhira akontese udan boot. Kondisaun natureza ita la espera, maski rai ten sira hasai hotu ona maibé kontinua monu tan bainhira  udan maka’as, ita hein to’o barak mak hasai, maibé ami nafatin prontu 24 oras iha terrenu halo normalizasaun atu komunidade bele asesu lalais,” nia akresenta.

Komunidade lokál hulan motorizada hakat estrada ne’ebé hetan estragu tanba rai halai iha iha aldeia Fatuk-boot, suku Leo-lima, ne’ebe liga hosi postu administrativu Balibo bá Maliana villa, munisípiu Bobonaro, domingu (26/12). Imajen TATOLI/Sérgio da Cruz

Tuir abitante suku Leo-lima, Agrefino de Carvalho, kondisaun atuál estrada halo ema labele liu ho transporte, maibé la’o ain de’it.

“Ami preparadu hulan motorizada sira ho folin depende ba negosiasaun ho motor-na’in. Ohin ami foin hahú tamba haree ema barak mak presiza liu, entaun ami buka malu halo grupu ida ema na’in-neen ou lima hodi hulan motor kiik $25 no motor boot $35, maibé depende ba maluk sira-nia kompreensaun, dalaruma ita bele ko’alia ho na’in didi’ak, folin la hansan, tamba ema balun estudante no komunidade baibain osan la to’o, ita bele ajuda,” abitante lokál ne’e haktuir.

Komunidade lokál hulan motorizada hakat estrada ne’ebé hetan estragu tanba rai halai iha iha aldeia Fatuk-boot, suku Leo-lima, ne’ebe liga hosi postu administrativu Balibo bá Maliana villa, munisípiu Bobonaro, domingu (26/12). Imajen TATOLI/Sérgio da Cruz

Iha sorin seluk, haree ba kondisaun estrada, motorista Bus Bintang dirasaun Dili-Maliana, Abrao Lopes, triste tamba la hetan rendimentu, maski tula pasajeiru sira nakonu maibé la konsege to’o destinasaun.

“Ohin ami halai duni tempu, maibé to’o iha ne’e labele liu bá Dili, balun halerik mai ha’u dehan presiza loos atu liu, balun dehan atu bá oan nia graduasaun, entaun ho kondisaun hansane ita lebele obriga pasajeiru sira liu, pasiénsia ami tenki lori filafali bá Maliana, tamba iha ne’e uma mós laiha, ita haree labarik kiik mos barak, pasiénsia aban mak mai fali,” nia dehan.

Biban ne’e, Motorista husu ba ministériu kompetente atu buka mekanizmu di’ak ida loke estrada alternativa seluk, nune’e bainhira tinan oin situasaun kontinua, bele iha ona alternativa.

Tuir observasaun Agência TATOLI iha terrenu, nota katak maski udan boot, maibé komunidade sira ne’ebé utiliza transporte privada no públika sira  kontinua hein tula sasán nesesidade bázika no materiál konstrusaun bá Maliana villa, Bobonaro, Cailaco no Lolotoe.

Jornalista : Sérgio da Cruz

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here