Tékniku EDTL, E.P halo instalasaun liña eletrisidade iha área Colmera, Dili, segunda (25/10). Imajen TATOLI/António Gonçalves

DILI, 26 dezembru 2021 (TATOLI)–Ekipa konjunta kompostu hosi Komisaun Antí-Korrupsaun (CAC, sigla portugés) no Eletricidade de Timor-Leste, Empreza Públika (EDTL, E.P) konsege salva osan Estadu hamutuk $77.023,60, hafoin konklui serbisu inspesaun projetu liña eletrisidade iha munisípiu lima.

Serbisu inspesaun realiza iha munisípiu Liquiçá, Covalima, Ainaro, Aileu no Manatuto, durante fulan-outobru to’o dezembru 2021.

“Ekipa konjunta ne’e hahú serbisu inspesaun, hafoin Unidade Inspesaun no Monitorizasaun (UIM) iha Diresaun Prevensaun no Sensibilizasaun CAC halo serbisu inspesaun inisiál iha terrenu no revela iha indísiu ne’ebé hatudu katak empreza ezekutadór projetu halo prátika violasaun dokumentu tékniku hanesan Bill of Quantity (BoQ) no dezeñu,” refere nota ne’ebé Agência TATOLI asesu, domingu ne’e.

Notísia relevante: EDTL, E.P rekolla reseita millaun $30,8 ba konfre Estadu

Nune’e, ekipa UIM-CAC rekomenda ba dirijente EDTL, E.P atu kolabora di’ak no responde kestaun ne’e, hodi halo inspesaun filafali, ne’ebé hosi rezultadu no konkordánsia unanimente entre parte rua ho empreza implementadór, tenki ko’a empreza nia osan ba violasaun ne’e.

“Daudaun ne’e, ekipa inspetór hosi CAC kolabora ho ekipa tékniku EDTL hodi kontinua hala’o inspesaun no monitorizasaun ba projetu liña eletrisidade sira seluk iha munisípiu Covalima, Ainaro, Aileu no Manatuto,” nota ne’e informa.

Projetu tuan seidauk konklui to’o agora

Aleinde ne’e, durante hala’o serbisu, ekipa inspesaun UIM-CAC deskobre mós katak daudaun ne’e iha projetu balun ne’ebé implementa ona desde tinan fiskál 2016, maibé to’o agora seidauk konklui no entrega tuir kontratu ne’ebé determina, ne’ebé empreza ezekutadór sira sei hetan sansaun.

Iha mós projetu balun ninia progresu pagamentu atinje ona 90%, maibé komunidade barak mak seidauk asesu ba liña eletrisidade.

Deskobre mós prátika ne’ebé bele iha posibilidade empreza implementadór hala’o obra Estadu, ho kondisaun komete fraude durante prosesu implementasaun projetu.

Ho deskobrimentu hirak ne’e, CAC sei rekomenda pontu balun ba autoridade responsável atu nafatin kontinua halo re-inspesaun iha futuru hodi asegura implementasaun projetu tuir kontratu estabelesidu ho efetivu, efikásia no tuir tempu determinadu.

Antes ne’e, iha agostu 2021, EDTL, E.P halo anunsiu konkursu eletrifikasaun nasionál hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu no hosi prosesu ne’e iha empreza nasionál hamutuk 167 mak interese aplika iha faze dahuluk projetu.

Prezidente Repúblika, Francisco Guterres ‘Lú Olo’, promulga Dekretu-Lei kona-ba transformasaun estatutu EDTL hosi diresaun jerál ba empreza públika (EDTL, E.P) iha loron 20 jullu, maibé mudansa transformasaun ne’e akontese iha janeiru 2021.

Durante tranzisaun ba empreza públika, funsionáriu EDTL hosi diresaun hamutuk iha na’in-500.

Governu aprova ona estatutu EDTL sai hanesan empreza públika ho esperansa katak bainhira muda ona estatutu bele hamenus burokrasia no bele iha independénsia foti desizaun no halo atendimentu públiku ba avariasaun sira ho lalais no sustentável liután.

Molok muda estatutu, EDTL hanesan diresaun jerál ida ne’ebé tutela ba Ministériu Obra Públika (MOP), nune’e atendimentu ba kliente tuir burokrasia iha ministériu sira, tanba ne’e bainhira muda ona ba empreza públika maka instituisaun ne’e iha ona autonomia fiananseira hodi halo atendimentu ho efetivu liután.

Hahú hosi janeiru to’o novembru 2021, EDTL, E.P rekolla reseita millaun $30,8 ba konfre Estadu hosi kliente ne’ebé uza kontadór pre-pagu.

Jornalista : Natalino Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here