Bispu Dioseze Maliana, Dom Norberto do Amaral. Imajen TATOLI/António Gonçalves

COVALIMA, 26 dezembru  2021 (TATOLI)–Bispu Dioseze Maliana, Dom Norberto do Amaral, husu ba família sira atu fiel nafatin iha sakramentu matrimóniu. 

“Ohin Amu Bispu  manda mensajen ba ha’u, atu hato’o k’solok parabéns ba família sira no husu atu fiel iha sakramentu matrimóniu. Tanba ne’e, Amu Bispu sei reza ba imi hotu nia família, iha ita-nia Dioseze laran tomak inklui ita-nia pároku ida-ne’e,” Padre Pároku Ave Maria Suai, Sebastião Eugênio da Cruz Correia, hato’o mensajen hosi Dom Norberto, durante prezide misa iha Igreja Ave Maria Suai, domingu ne’e. 

Amo Bispu dehan, maski bainhira harii uma-kain sempre hasoru difikuldade iha moris loron-loron, maibé tenke fiel nafatin iha sakramentu matrimóniu.

“Ami Bispu dehan hala’o moris nu’udar kaben-na’in ne’e iha nia midar no moruk, ne’ebé ema tenke koko hanesan kruz iha  família nia-laran. Ita-nia kruz mak  brani tenke haraik-an no perdua malu ba todan ne’ebé ita simu, hanesan problema uma-laran nian, hanesan kruz ne’ebé ita buka atu lori,” nia akresenta.  

Iha misa domingu sagrada família ne’e, aleinde Padre Pároku hato’o mensajen hosi Dom Noberto, hato’o agradese mós ba família ne’ebé sempre kolabora ho igreja.

Padre Pároku Ave Maria Suai, Sebastião Eugênio da Cruz Correia. Imajen TATOLI/Celestina Teles

“Ohin festa família nian, ha’u nu’udar Padre Pároku, agradese ba família ne’ebé sempre kolabora ho uma-kreda bainhira hetan problema, hodi bele rezolve no ita buka serbisu hamutuk hodi harii ita-nia fiar loloos, liuliu unidade iha família nia-laran atu fiel no iha domin ba malu,” Padre Pároku Ave Maria Suai dehan. 

Nia konsidera, ho festa sagrada família ne’e, bele fó hanoin hikas ida-idak ninia pasadu.

“Karik halo ona promesa iha igreja ou la’e, dala ruma la kumpre ona, ohin bele renova fali.  Tanba ne’e, feliz ba família sira ne’ebé fiel iha sakramentu ne’e hodi kontinua fiel nafatin. Maski dala ruma ita monu duni, maibé  ohin fanun fali ita atu hakbiit no renova fali ita ho eukaristia  ohin, atu hakbiit fali ita iha sakramentu matrimóniu ne’e,” nia subliña.

Jornalista : Celestina Teles

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here