Sarani sira hala'o selebrasaun missa kalan Natál iha Igreja Katedrál Dili, sexta (24/12). Imajen Tatoli/Francisco Sony

DILI, 25 dezembru 2021 (TATOLI)— Padre Pároku Maria Imaculada Conceição Katedral Dili, Leandro Maria Alves, hateten, espíritu selebrasaun santo Natál hanorin sarani katóliku ka ema-hotu hatene haraik-an ka umildade hodi serbí malu ho domin no dame.

“Iha selebrasaun Natál ida ne’e hanorin ita hotu atu haraik-an hodi serbí malu hodi moris iha dame no domin nia laran, atu simu ita-nia kosok-oan Jesus Kristo ne’ebé mak mai moris iha ita le’et,’’ Padre Pároku  ne’e hateten bainhira prezide misa iha katedral, Sábadu ne’e.

Selebrasaun Natál mós hanorin sarani katólika atu hakbesik an ba Maromak nia domin no Maromak nia espíritu atubele hetan rahun di’ak tanba Jesus Kristu mak grasa úniku ba sarani-sira nian.

Nune’e, Amu Pároku ne’e husu ba sarani katótolika iha selebrasaun festa Natál tenke fó domin ba malu no perdua malu hodi fahe domin ba malu no fó ksolok ba malu.

Iha biban ketak, Padre selebrante misa iha Igreja Ave Maria Suai, Luís Goveia Leite, hateten, iha tempu selebrasaun Natál ne’e sarani ida-idak tenke halo reflesaun ba nia hahalok sira.

“Ita presiza atu refleta fali hahalok-sira liuhosi Natál ne’e, nune’e ita bele moris foun  hamutuk ho Jesus Kristu ne’ebé  moris  ona iha ita nia le’et atu hamoris ita,  atu muda ita nia atitude  ida ne’ebé lá tuir Maromak nia hakarak,” Amu Luís afirma.

Nune’e, Amu mós husu ba Suai-oan sira atu tenke badinas estuda tanba Maromak haraik riku-soin barak mai iha munisípiu ne’e liuliu mina no gás.

“Nune’e, Kristu mai atu fanun ita Suai-oan hader hamutuk ho liafuan no asaun ne’ebé loos no di’ak ba ita nia futuru,” nia ekoraja.

Entretantu, Padre Pároku Igreja Viqueque, João Tamonob, mós afirma tempu Natál mós fó hanoin atu ema hotu hatudu sentimentu agradese.

“Iha Tempu natál ema hotu tenke hatudu sentimentu agradese tanba Jesus mai atu soi ita,” Amu Padre selebrante, João Tamonob, SVD, iha parokia Nosa Senora de Fatima ba jornalista Agência Tatoli, iha parokia Uatulari, sesta ne’e.

Maromak haraik nia oan mane mai mundu hodi fó naroman ba mundu, tanba ne’e tinan-tinan sarani katóliku sempre selebra Natál.

“Ita nafatin selebra Natál tanba mundu nakonu ho frakeza barak akontese. Tanba ne’e, Natál iha atu mundu sai foun no mundu hetan naroman hodi la’o nafatin,” Amu afirma.

Notisia Relevante: Dom Virgílio: ukun na’in di’ak tenke hatene serbí povu

Jornalista: Felicidade Ximenes/Celestina Teles/Vitorino Lopes da Costa

Editór      :  Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here