Xefe suku Sagadate, Aureliano de Jesus. Imajen Tatoli/Natalino Belo.

BAUCAU, 23 dezembru 2021 (TATOLI) – Progresu konstrusaun Uma Kbiit Laek (UKL) liuhosi Programa Nasionál Dezenvolvementu Suku (PNDS) iha aldeia Ulabuti, suku Sagadate, postu administrativu Laga atinje 55%.

Xefe suku  Sagadate, Aureliano de Jesus, hateten, benefisiáriu hamutuk na’in-tolu, na’in-ida hetan medida 42 m² ho orsamentu rihun $1.700 no rua seluk medida 38 m² ho orsamentu rihun $1.400.

Nune’e totál orsamentu ba UKL iha suku Sagadate hamutuk $54.108 ne’ebé aloka ba orsamentu fíziku $51.000, kustu operasionál hamutuk $3.000 no fee ba Banku Nasionál Komérsiu Timor-Leste (BNCTL, sigla Portugés) hamutuk $108.

“UKL ha’u hanoin agora pursentu 55 ona, tanba hein de’it sira lori kalen ba taka,” Xefe suku Sagadate hateten iha Sentru Konvensaun Baucau (CCB, sigla Portugés), kinta ne’e.

Tinan 2021, suku Sagadate liuhosi PNDS aloka Reziliénsia Komunitária no Rekuperasaun Ekonomia (RKRE) no atividade kanaliza bee-mos ho totál orsamentu $ 32.000. Nune’e mós atividade Reabilitasaun Sede Suku (RSS) hamutuk rihun $11.000.

“Esperansa ba tinan-2022 oinsá bele aumenta tán UKL no oinsá mak komunidade hotu bele asesu bee-moos,” Aureliano akresenta.

Suku Sagadate iha aldeia 11 komposta hosi Abuti, Alasafa, Auraba, Beliuali, Ia Sula, Naha-Afa, One-Bu’u, Samagata, Selegua, Sire-Bu’u, Ulabuti ho totál populasaun 3.485 hosi xefe-família 913.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here