PA RAEOA inaugura sistema gravitasaun bee-moos iha Pante Makasar. Imajen/mídia ZEEMS.

OÉ-CUSSE, 23 dezembru 2021 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), kuarta ne’e inaugura projetu sistema gravitasaun bee-moos iha aldeia Nemun, suku Taiboko, sub-rejiaun Pante Makasar.

Prezidente Autoridade RAEOA, Arsénio Paixão Bano, informa, fasilidade kanalizasaun ne’e fasilita direta komunidade sira iha aldeia refere ne’ebé envolve bairru sia (9) iha suku Taiboko, ho totál benefisiáriu hamutuk uma kain-500 ho populasaun hamutuk na’in-2.032.

“Autoridade kontente tanba tinan ne’e konsege rezolve daudaun problema bee-moos iha Taiboko, fasilidade ne’e fó tulun ba komunidade barak, liuliu eskola oan sira, no komunidade tomak asesu ona bee, komesa ohin ba futuru sei laiha ona problema bee-moos iha Taiboko,” Arsénio Paixão Bano, informa ba Agênci Tatoli iha edifísiu ZEESM, Oé-Cusse, kinta ne’e.

Nia apela ba komunidade no autoridade lokál Taiboko, atu tau matan ba fasilidade bee-moos ne’e, nune’e dura ba tempu naruk.

Xefe suku Taiboko, Joaquin Tafin, agradese ba autoridade RAEOA, tanba suku Taiboko hetan ona fasilidade bee-moos ho kualidade, nune’e nia parte promete sei kuida obra ne’e no sei tau tara-bandu atu labele hetan estraga hosi animál.

Entretantu, projetu kanalizasaun sistema gravitasaun bee-moos ne’e, ezekuta hosi empreza Noemnasi Unipesoál Lda, ha valór kontratu $273,074.06 hodi konstrui obra ne’e ho volume bee 2-litru/segundu, kompleta ho tanki bee hamutuk tolu, komposta hosi tanki ida (1), tanki rezervatóriu ida (1) no tanki distribuisaun ida (1), hodi kanaliza ba torneira públiku hamutuk unidade 14.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here