Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio  Paixão Bano. Imajen Tatoli/António Gonçalves

OÉ-CUSSE, 23 dezembru 2021 (TATOLI) – Mensajen Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, husu Atoni-oan sira hanoin pozivu nune’e dezenvolve rejiaun ne’e ho prosperiedade.

“Ha’u husu de’it tinan 2021 atu liu dadaun ona, ita hotu ne’ebé maka iha problema privadu ho problema seluk, ita tenke tenke perdua malu tanba ne’e maka dalan di’ak ba ema idak-idak, tenke hanoin pozitivu de’it,” Prezidente Autoridade RAEOA, Arsénio Paixão Bano, informa ba Agência Tatoli iha edifísiu ZEESM, Oé-Cusse, kinta ne’e.

Nia hatutan “Iha tinan 2022 ne’e, tenke mai ho espíritu foun, serbisu públiku tenke vontade liután, komunidade sira iha teritóriu Oé-Cusse tenke iha vontade, hodi hadi’a moris-án rasik, nune’e hamutuk hadi’a Oé-Cusse, ida-ne’e maka ita hotu nia esperansa,” nia fó hanoin ba Atoni-oan sira.

Iha parte seluk, PA RAEOA ne’e agradese no fó obrigadu ba kooperasaun tomak iha tinan 2021, tanba ho povu Oé-Cusse nia kooperasaun konsege aguenta to’o tinan 2021 nia rohan hodi luta kontra surtu COVID-19.

Ezekutivu ne’e agradese ba populasaun Oé-Cusse tanba ho sira-nia kooperasaun partisipa iha kampaña vasinasaun, hodi to’o ohin RAEOA atinje ba doze segundu to’o ona 70% no primeira doze atinje ona 80%.

“Ha’u husu de’it ba sira-ne’ebé partisipa vasina, kontinua halo esforsu kolabora ho fasilidade saúde simu vasina, tanba ho vasina ne’e bele proteje Oé-Cusse, proteje-aan no proteje Timor-Leste,” nia apela.

Progresu iha 2021

Iha 2021 autoridade hala’o serbisu no programa barak ba infraestrutura bázika iha Oé-Cusse, aumenta fasilidade iha edukasaun, konstrui eskola foun unidade 20 no reabilitasaun eskola barak iha sub-rejiaun sira no suku 18.

Nune’e mós asuntu bee-moos, autoridade halo projetu kaptasaun bee-moos, perfurasaun iha fatin-fatin, programa food for work konserva bee-matan sira iha suku hotu-hotu.

Nune’e mós, autoridade halo projetu Gabiaun kuaze unidade 25 atu proteje área produtiva natar no to’os, autoridade konstrui konstrusaun ba fasilidade saúde públika nian.

“Buat sira-ne’e hotu, ita halo iha tinan 2021 balu remata ona serbisu, no balu sei kontinua mellora. Ida-ne’e ita sei kontinua serbisu iha tinan 2022, autoridade otimista hakarak rezolve povu Oé-Cusse atu labele izola-aan, tanba Oé-Cusse rai enklave, ha’u hakarak informa Oé-Cusse tenke ba oin presiza serbisu maka’as hamutuk ida lori Oé-Cusse ba oin,” nia fó-sai.

Nune’e mós autoridade hamosu inisiativa desportiva ba joventude sira liuhosi Kopa Assosiasaun Futeból Oé-Cusse (AFO) sub-22, fasilita formasaun ba juveníl sira, autoridade promete iha tinan oin, autoridade sei hasa’e-tán programa desportiva , hodi reforsa serbisu AFO atu kontinua promove talentu joven sira, tanba buat sira-ne’e ba Oé-Cusse nia di’ak.

Notisia relevante: RAEOA propoin millaun $84-resin iha OJE 2022

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here