Benefisiáriu nesesidade bázika. Imaje Tatoli//Vitorino Lopes

VIQUEQUE, 24 dezembru 2021 (TATOLI)- Governu liuhosi Ministériu Koodenadór Asuntu Ekonomia (MKAE), iha ámbitu natál no tinan foun ne’e, sei apoiu nesesidade bázika hanesan ai-han ba kbiit la’ek hamutuk 1.782 iha munisípiu Viqueque. Distribuisaun ba apoiu ne’e hala’o liuhusi Sentru Lojístika Nasionál (CLN-sigla portugés).

“Tuir loos ohin ne’e ita fahe ona ai-han bázika ba kbiit la’ek sira iha munisípiu Viqueque. Maibé, karreta kontentór tula produtu aat iha área Fatu Ahi nian tanba ne’e ita la konsege fahe. Ami tau fali data tentativa 29 dezembru,” Diretór jerál CLN, Jacinto Paijo ba jornalista Agência Tatoli, iha administrasaun munisípiu Viqueque, sesta ne’e.

Jacinto hatutan, apoiu ba kbiit la’ek sira, Governu hanesan fahe prezente iha loron natál no simu tinan foun. Tuir loos ne’e, ohin fahe ona ba kbiit laek, maibé karreta aat tiha tanba ne’e la konsege fahe.

“Ha’u lori ministru ministru MKAE husu deskulpa povu Viqueque tanba la konsege lansamentu ba distribuisaun ai-han ba kbiit laek sira,” nia hato’o.

Tuir dadus kbiit laek hosi munisípiu Viqueque kada postu hosi postu Lacluta totál benifisiáriu hamutuk na’in 613, postu Ossu hamutuk na’in 312, Uatucarbau benifisiáriu hamutuk na’in 300, Uatulari hamutuk na’in 144, Viqueque hamutuk na’in 413 no totál benifisiáriu hosi munisípiu Viqueque hamutuk na’in 1.782.

Ai-han báziku kompostu husi koto falun neen, fore-mungu neen, fore-metan tolu, fore-rai falun ida, foos falun neen no batar.

Distribuisaun ai-han báziku iha munisípiu Viqueque responsabiliza hosi CLN no distribui hosi empreza distributór, Brandital.

Iha fatin hanesan, Administradór munisípiu Viqueque, Januario Soares “Bolly” haktuir, data distribui lolos ohin ne’e fahe, maibé karreta lori produtu mai aat tiha tan ne’e labele distribui.

“Apoiu ne’ebé Governu atu apoiu ba kbiit la’ek ne’e ohin ita fahe ona, maibé karreta aat iha dalan tanba ne’e la konsege realiza,” nia haktuir.

Jornalista :Vitorino Lopes da Costa
Editór : Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here