Logo UNITAL. Imajen/Espesiál

DILI, 23 dezembru 2021 (TATOLI)–Universidade Orientál Timor-Lorosa’e (UNITAL) integra tan estudante finalista hamutuk 518 ba komunidade tanba termina ona estudu baxarelatu no lisensiatura, liuhosi seremónia graduasaun.

Reitór UNITAL, Florindo Pereira, hateten, seremónia graduasaun ba ne’e tama ona ba da-IX, ne’ebé estudante preparadu atu kontribui ba dezenvolvimentu nasaun hodi tulun komunidade iha baze.

“Durante ne’e universidade iha mehi boot hakarak prepara rekursu umanu ho kualidade no iha kapasidade, nune’e bainhira estudante sira filafali ba komunidade, bele halo netik buat ruma,” Reitór UNITAL dehan iha seremónia graduasaun, iha salaun universidade, Becora, kinta ne’e.

Notísia relevante: UNITAL seidauk deside loron graduasaun ba estudante finalista

Tuir nia, bainhira estudante ida hetan ona grau akadémiku baxarelatu ka lisensiatura, tenke brani moris iha inserteza laran.

“Signifika situasaun saida de’it mak akontese estudante tenke iha maneira barak hodi bele ultrapasa dezafiu sira ne’e,” nia motiva.

Bainhira Timor-Leste restaura independénsia, UNITAL mai ho hanoin hakarak dezenvolve rekursu umanu nasaun ne’e atu prepara ba futuru, ne’ebé universidade kontinua motiva dosente sira atu brani hasoru dezafiu hodi atinje meta ne’ebé iha, nune’e dezde tinan-2002 to’o 2021, UNITAL konsege prodús ona rekursu umanu 4.957 ne’ebé oras ne’e kontinua moris iha sosiedade nia le’et hodi dezenvolve nasaun.

“Ita-nia mehi lakohi gradua atu duni de’it títulu no sertifikadu hanesan estudante ensinu sekundáriu sira. Tanba ne’e, estudante UNITAL tenke sai di’ak liu no kria rasik kampu traballu ba ema seluk.

“Saida mak atu halo lalika hakfodak, naran katak buat ne’ebé atu halo di’ak ba ema barak. Universidade oferese ona tudik ho katana ne’e ba ita-boot sira, agora imi mak hatene no jere oinsá atu uza, bainhira imi hatene uza mak imi sei prodús buat ruma, maibé bainhira rai de’it imi sei labele han buat ruma. Universidade prepara imi sai matenek la loos atu ba buka serbisu de’it, maibé imi tenke kria serbisu,” nia dehan.

Enkuantu estudante 518 ne’ebé gradua mai hosi fakuldade hitu hanesan edukasaun, saúde, agrikultura, ekonomia, direitu, enjeñaria, inklui sosiál polítika.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here