Prezidente CNE, José Agostinho da Costa Belo. Imajen TATOLI/Egas Cristóvão.

DILI, 23 dezembru 2021 (TATOLI)—Prezidente Repúblika, Francisco Guterres ‘Lú Olo’, husu Komisaun Nasionál Eleisaun (CNE, siglá portugés) nu’udar orgaun eleitorál atu kontinua servisu ho imparsialidade iha eleisaun prezidensiál 2022.

Notísia Relevante: PR Lú-Olo husu CNE kontinua halo edukasaun sívika ba eleitór-sira

“Prezidente Repúblika nia hanoin mak CNE hanesan orgaun eleitorál eleisaun ne’e importante ba ita-nia rain no sidadaun, tanba ne’e tenke servisu ho imparsialidade no neutrál nafatin. No Estadu nafatin apoiu órgaun eleitorál hodi halo eleisaun ne’ebé di’ak no husu debate sira ne’ebé atu mai tenke formula ho di’ak no kualidade atu bele ajuda eleitór hodi fó votu ba kandidatu sira-ne’ebé atu mai, nune’e iha tempu ne’ebé mai sei regula ho di’ak,” Prezidente CNE, José Agostinho da Costa Belo, hateten ba jornalista sira hafoin ramata enkontru ho Xefe Estadu iha edifísiu Palásiu Prezidensiál Nicolau Lobato, Bairru Pite, Dili, kinta ne’e.

Durante sorumutu ne’e, CNE hato’o prosesu rejistu resensiamentu eleitorál ne’ebé daudaun ne’e la’o hela no tuir planu sei konklui iha fulan-janeiru tinan 2022.

Prezidente Repúblika akompaña no fó korajen nafatin órgaun eleitorál rua hanesan CNE no STAE atu servisu ho di’ak liután.

“Ami husu mós Prezidente Repúblika nia opiniaun hanesan mós lidér nasionál ida, oinsá eleisaun mai ne’e la’o ho demokrásia ne’ebé atinje ona ho di’ak liután, atu nune’e ho apoia morál no polítika ba órgaun eleitorál servisu susesu. Pontu importante hirak ne’e mak ami hato’o ba Prezidente Repúblika,” nia dehan.

Prezidente CNE ne’e informa, tuir dadus provizoriu hatudu katak eleitór sira-ne’ebé rejistu ne’e hamutuk 855,597-resin.

Notísia Relevante: Ekipa resensiamentu eleitorál iha diáspora rejista votante 367  

Maibé, nia dehan, ho mudansa ba lei resensiamentu eleitorál ne’ebé la’o hela difikulta mós ita-nia sidadaun sira liu-liu estudante hanesan eleitór foun atu hasai kartaun eleitorál, tanba agora uniku rekezitu mak kartaun eleitorál ho situasaun iha área postu sira atu mai to’o munisípiu mak trata ho prosesu ida naruk.

CNE iha ona hanoin servisu hamutuk ho STAE no Servisu Rejistu Notariadu hosi Ministéiru Justisa atu fasilita sidadaun ka eleitór sira ne’ebé atu rejistu foun eleitór tuan sira-ne’ebé atu renova sira-nia kartaun eleitorál ne’ebé lakon ka aat ona.

Antes ne’e, Diretór Jerál STAE, Acilino Branco, hateten ho atividade resensiamentu eleitorál ne’ebé lansa to’o iha 08 novembru tinan ne’e rejista tan eleitór foun hamutuk 20.076 kompostu hosi nasionál 20.027 no rai-li’ur 49.

Tuir dadus hosi STAE, to’o iha 08 novembru 2021 ne’e eleitór ne’ebé resensiadu no atualizadu foun no tuan iha baze dadus akumula eleitór hamutuk 855.597 ne’ebé kompostu hosi diáspora 65.38 no rai-laran hamutuk 849.059.

Iha eleisaun prezidensiál tinan 2022 ne’e, Governu identifika ona hodi aumenta sentru votasaun hamutuk 1.200 no estasaun votu iha 1.500 iha territóriu tomak.

CNE kontinua halo edukasaun sivíka

Prezidente Komisaun Nasionál Eleisaun (CNE, siglá portugés) ne’e hateten, kontinua halo edukasaun sivíka ba sidadaun iha territóriu hodi hasa’e partisipasaun sosiedade iha eleisaun prezidensiál 2022.

“Edukasaun sivíka, tama ona dezembru, ami kuaze atinjr ona númeru ne’ebé iha ne’ebé iha komisáriu sira halo movimentu servisu iha baze,” Prezidente CNE ne’e hateten ba jornalista sira hafoin ramata enkontru ho Xefe Estadu iha edifísiu Palásiu Prezidensiál Nicolau Lobato, Bairru Pite, Dili, kinta ne’e.

Edukasaun sívika hanesan instrumentu ida importante tanba ita-nia votasaun la’ós obrigatóriu, nune’e aproximasaun ne’ebé halo ho esplikasaun sira atu nune’e oinsa eleitór iha vontade hodi partisipa másimu iha eleisaun prezidensiál 2022 ne’e.

Nia dehan, edukasaun sivíka ne’e nia prioridade ba estudante no sidadaun eleitór foun hodi esplika kona-ba importansia eleisaun ho partisipasaun eleisaun.

Maibé, edukasaun sívika ne’e hala’o mós ba komunidade no estrutura partidu polítiku sira atu nune’e akompaña prosesu simu eleisaun ho kampaña ne’ebé atu mai ho di’ak.

Notísia Relevante: PNUD-STAE-CNE diskute preparasaun eleisaun prezidensiál reziliente ba Timor-Leste

Jorrnalista : Nelson de Sousa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here