Autoridade seguransa hala’o formatura jerál hodi prepara hala’o show force hodi fó seguransa ba komunidade Covalima durante festa natál no tinan foun. Imajen Tatoli/Celestina Teles.

COVALIMA, 23 dezembru 2021 (TATOLI)—Autoridade seguransa PNTL (UPM, UPF, BOP) no autoridade Defeza FALINTIL-Forsa Defeza Timor-Leste (F-FDTL) sei halo patrulla hamutuk durante selebra loron-boot Natál (25 dezembru 2021) no tinan foun (01 janeiru 2022) hodi garante seguransa ba povu Covalima. 

“Loron ksolok ba festeza natál no tinan foun ba iha ita-nia nasaun Timor-Leste liu-liu iha ita-nia munisípiu Covalima, ha’u simu kompeténsia hosi komandante PNTL Munisípiu Covalima hodi realiza parada konjunta entre PNTL ho F-FDTL hodi halo show force prontu no garante fó seguransa ba ita-nia sarani sira hosi relijiaun oioin iha Covalima,” Segundu Komandante PNTL Munisípiu Covalima, Albino Mouzinho, hato’o liuhosi nia diskursu bainhira lidera show force iha Komandu PNTL, Covalima, kinta ne’e. 

Durante loron boot natál sarani sira sei ba reza iha igreja, nune’e autoridade seguransa prontu asegura situasaun ordem públiku tuir despaixu komandante jerál no orientasaun mai iha komandu hotu iha territóriu Timor-Leste, liu-liu iha Covalima hodi haree situasaun jerál durante períodu festa natál no tinan foun ne’ebé mak sei mai.

Aleinde autoridade seguransa garante seguransa ba sarani sira hodi selebra festa natál no tinan foun ne’ebé sei mai, autoridade seguransa mós sei kontrola joven sira-ne’ebé harii prezépiu iha dalan ninin. 

“Ita sei haree, ita-nia joven sira-ne’ebé mak harii no hadi’a prezépiu sira-ne’ebé iha dalan ninin mínimu metro 50 ba kotuk. Ohin show force ida-ne’e ita halo buat rua mak hala’o ita-nia misaun, ita halo sensibilizaun no disemina informasaun ba ita-nia joven sira no sarani sira iha Covalima. Ami prontu garante seguransa ba sira,” nia dehan.

Tuir regra, nia dehan, harii prezépiu tenke metru 50 ba kotuk no iha prezépiu ne’e joven sira labele kanta múzika domin no labele dansa halimar, maibé tenke asegura katak ba Maromak ne’e reza mak loos no labele hemu tua iha prezépiu ne’ebé prepara ba kosok-oan Jesus.

“Ita halo misaun boot mak garante seguransa iha períodu natál ho tinan foun hodi kria pás no  estabilidade. Ita garante seguransa ba ita-nia sidadaun ka sarani Katólika sira livre iha selebrasaun ne’e,” nia informa.  

Bazea ba fiar ema ida-idak nian atu ba reza ka ko’alia ho Maromak, hodi husu saida mak halo iha tinan ne’e hodi hato’o ba Maromak hodi fó buat foun hosi tinan foun nian hodi dezenvolve rai, ekonómia família uma laran, dezenvolve oan sira matenek, dezenvolve rai ne’e di’ak garante Covalima tenke ba oin no sidade ne’ebé moos hakmatek, ema hotu gosta mai vizita, moris ambiente no nakonu ho fi’ar.  

“Ita-nia hanoin tomak seguransa ne’e hola parte iha ita-nia liman. Tantu PNTL no F-FDTL, ita nia komunidade, iha ida-idak nia família tenke hateten seguransa mai hosi ha’u-nia família sira, orienta oan sira tenke hakmatek no ba misa ida mak ohin ita belé halo parada jerál,” nia haktuir. 

Hafoin ramata show force ka parada jerál sira tuir rute ne’e aprezenta hosi komandate operasaun seguransa konjunta iha loron boot natál no tinan foun, nune’e sarani sira tenke hakmatek simu Nai Jesus moris, simu tinan foun ho klosok nakonu ho espetativa oioin ba moris di’ak.

“Ha’u husu garante seguransa ida-ne’e ho rigór tuir misaun PNTL hakarek iha konstituisaun Repúblika no lei orgánika PNTL no instituisaun F-FDTL,” nia haktuir.

Lori Komand PNTL no komandante PNTL Covalima nia naran husu atu garante seguransa no mantein regra tuir konstituisaun RDTL. 

“Ita kontinua mantein ida-ne’e hodi simu tinan foun mai iha ita nia leet no ita sei servisu nafatin hasa’e ita-nia profsionálizmu, matenek hodi servi no tulun komunidade iha parte seguransa. Garante katak moris hotu tenke seguru no pás,” nia dehan.

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here