Ministra Saúde, Odete Maria Freitas Belo. Imajen Tatoli/Francisco Sony

DILI, 23 dezembru 2021 (TATOLI)— Ministériu Saúde (MS) hamutuk ho Hospitál Nasionál Guidu Valadares (HNGV), hala’o avaliasaun anuál prestasaun kuidadu saúde no tratamentu COVID-19 iha Timor-Leste.

Biban ne’e, Ministra Saúde, Odete Maria Freitas Belo, hateten, objetivu avaliasaun ba pontu forte no fraku inklui dezafiu sira atubele hadi’a iha tinan oin (2022) hodi mellora servisu prestasaun saúde no tratamentu COVID-19.

“Tinan 2011 atu ramata, ita uza oportunidade ida ne’e hodi halo avaliasaun saida mak bele hadi’a no saida mak sira halo ona. Nune’e ba oin sira bele hadi’a di’ak liután jestaun servisu liuliu servisu ba atendimentu ka tratamentu COVID-19. Tanba ita haree katak variante Omicron ne’ebé mosu, entaun ita nafatin halo preparasaun,’’ Ministra Saúde, hateten ba jornalista sira iha HNGV-Bidau, kinta ne’e.

Governante ne’e observa iha dezafiu lubuk ida mak pesoál saúde sira hasoru durante pandemia globál, hanesan iha jestaun kazu lojístika liuliu menus ekipamentu saúde no ekipamentu balun aat, maibe ema laiha atu hadia.

“Ita haree buat simples, maibé nia impaktu boot ba pasiente entaun ida ne’e mak problema atu  hadi’a oin atu hadia.

Nune’e, Ministra ne’e husu médiku sira fó atensaun ba moras esensiál seluk no estoke aimoruk no mantein medida prevensaun COVID-19.

“Ami presiza hadi’a iha tinan oin kona-ba problema lubuk ida ne’ebé mak  iha HNGV  no mós ospitál rejionál sira, sentru saúde no postu saúde  atu nune’e sira servisu ba komunidade ho di’ak liután,’’  Governante ne’e garante.

Iha biban hanesan, Médiku Espesialista HNGV, Flavio Brandão, hateten, avaliasaun ida ne’e atu haree servisu médiku sira iha iha Isolamentu Lahane no Vera-Cruz hodi bele hadi’a faillansu sira iha tinan oin.

“Ita hotu hatene katak iha ona variante foun (Omicron) ne’ebé presiza hadia di’ak liután liuliu rekomendasaun sira ne’ebé hato’o ba jestór sira atu konsidera,” nia afirma.

Profisionál Saúde ne’ebé mak durante halo servisu tratamentu saúde ba pasiente COVID-19 iha izolamentu Vera-Cruz no izolamentu Lahane hamtutuk 170-resin.

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here