Edifísiu UNPAZ iha Ai-mutin. Imajen/UNPAZ

DILI, 23 dezembru 2021 (TATOLI)–Ministériu Finansa (MF) realiza ona pagamentu izensaun propina segundu semestre ba estudante Institutu Ensinu Superiór lima ho montante millaun $3,7.

“Institutu Ensinu Superiór públiku no privadu sira ne’ebé hetan pagamentu mak hanesan Universidade da Paz (UNPAZ) ho montante millaun $1,1, Universidade Nasionál Timor-Lorosa’e (UNTL) $808.395, Institute of Business (IOB) ho montante $618.580, Universidade Orientál Timor Lorosa’e (UNITAL) $603.165 no Dili Institute of Technology (DIT) ho montante $552.726,” relata nota imprensa ne’ebé Agência TATOLI asesu, kinta ne’e.

Antes ne’e, iha loron 16 jullu 2021, MF realiza ona pagamentu izensaun propina primeira semestre ba estudante benefísiu hamutuk 60.000-resin iha Ensinu Superiór hamutuk 18, ho totál millaun $5,6.

Notísia relevante: Estudante 34.307 hosi universidade 16 simu inzensaun propina faze daruak

Iha maiu 2021, Prezidente Repúblika promulga Lei Orsamentu Jerál Estadu (OJE) Retifikativu, ne’ebé fó biban ba Governu hodi finansia medida sosio-ekonómiku neen hanesan apoiu ba empregu, moratoria kréditu, izensaun pagamentu propina no subsídiu internet ba estudante ensinu superiór, sosa produtu alimentár hosi produtór lokál, finansia operasaun Sentru Integradu Jestaun Krize (CIGC, sigla portugés), no finansia suplementu remuneratóriu ba traballadór liña frente ne’ebé presta serbisu mitigasaun COVID-19.

Nune’e, to’o loron 22 dezembru ne’e, ezekusaun fundu COVID-19 ba medida sira kompostu hosi apoiu ba empregu ezekuta ona osan $22.650 (50%) hosi totál orsamentu alokadu $45.256,20, moratoria kréditu ezekuta ona orsamentu alokadu $2.000.000 (100%) hosi totál orsamentu $2.000.000, izensaun pagamentu propina ba estudante ezekuta ona osan $11.055.932 (79%) hosi totál oramentu alokadu $14.000.000, subsídiu internet ba estudante $679.262 (32%).

Enkuantu, medida apoia seguransa alimentár ezekuta ona orsamentu $2.240.973 (19%) hosi totál orsamentu alokadu $12.000.000, finansia operasaun CIGC ezekuta ona $23.521.335 (28%) hosi totál orsamentu alokadu $83.410.800, Cesta Bázika ezekuta ona $66.013.768 (97%) hosi totál orsamentu alokadu $68.031.509, no finansia suplementu remuneratóriu ba traballadór liña frente ezekuta ona $33.944.228 (65%) hosi totál orsamentu $51.931.812,

Nune’e, fundu kontijénsia rezerva hamutuk $8.869.652 (0%) no totál orsamentu ba medida sira ne’e hotu ezekuta ona $162.105.498 (56%) hosi totál orsamentu alokadu $287.641.793.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here