Seremónia asina konkordánsia retira proposta indemnizasaun, iha sede suku Maluro, Viqueque, kuarta (22/12). Imajen/Timor GAP, E.P

DILI, 23 dezembru 2021 (TATOLI)—Komunidade suku Maluro, Beaço, Viqueque, iha kuarta (22/12) asina ona akta hodi retira proposta indemnizasaun rai no propriedade iha área designadu planta Liquefied Natural Gas (LNG), ne’ebé antes ne’e hato’o ba Governu iha loron 16 jullu 2019.

Antes komunidade retira proposta, Governu liuhosi Ministériu Petróleu no Minerál (MPM) no Timor Gás no Petróleu, Empreza Públika (Timor GAP, E.P) ne’ebé hanesan jestór ba projetu Tasi-mane halo aprosimasaun hodi loke diálogu ho komunidade suku Maluru, akompaña hosi autoridade lokál, lia-na’in, juventude, veteranu no mós Jerasaun Patriota, hamutuk ho autoridade Viqueque no entidade relevante seluk, iha loron 25 novembru 2021 tuir kultura lokál.

“Durante diálogu ho komunidade verbalmente, deklara hodi retira proposta indemnizasaun no entrega ba Governu hodi jere no implementa tuir lei ka rezolusaun Governu ne’ebé aplika ona ba Projetu Tasi Mane no Suai Supply Base, Aeroportu Suai, auto estrada no área dezignadu ba planta refineria Betano,” relata nota ne’ebé Agência TATOLI asesu, kinta ne’e.

Notísia relevante: Tinan oin, Kompensa Abitante Afetada ba Planta LNG iha Beasu

Inisiativa ne’e atu fasilita prosesu kontinuasaun ba libertasaun rai no propriedade iha área dezignadu projetu petrolíferu.

Nune’e, akta ne’ebé asina hanesan prova no kompromisu Estadu no povu, katak úniku opsaun dezenvolvimentu ba kampu mina no gas iha Greater Sunrise maka dada kadoras mai Beaço.

Aleinde ne’e, loke dalan ba entidade relevante envolve iha projetu Tasi Mane hodi kontinua halo estudu tékniku balun no prosesu identifikasaun rai no properiedade iha área dezignadu Planta LNG Beaço, área realokasaun komunidade Beaço no seluk tan.

Seremónia ne’e partisipa hosi Prezidente Autoridade Nasionál Petróleu no Minerál (ANPM), Florentino Soares Ferreira, Reprezentante hosi FALINTIL-Forsa Defeza Timor-Leste (F-FDTL), Jenerál Falur Rate Laek, Brigadeiru Jenerál Sabika Besi Kulit, Koronél Maubuti, Reprezentante MPM, Autoridade lokál, Reprezentante Komandu Polísia Nasionál Timor-Leste (PNTL) Viqueque, Veteranu, Jerasaun Patriota, Juventude no komunidade Beaço.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here