Grupu feto 34 iha RAEOA partisipa formasaun empoderamentu ekonomia ba jestaun organizasaun no finanseira. Imajen Tatoli/Abílio Elo Nini.

OÉ-CUSSE, 23 dezembru 2021 (TATOLI) Formasaun empoderamentu ekonomia kona-ba jestaun organizasaun no jestaun finanseira importante ba grupu feto 34 iha Rejiaun Administrativa Espesiál Oé-Cusse Ambeno (RAEOA).

Programa empoderamentu ekonomia ne’e fasilita hosi Gabinete Prezidente Autoridade RAEOA liuhosi Servisu Promosaun Igualdade no Inkluzaun Sosiál (SPIJIS) servisu hamutuk ho parseiru sira hosi institutu Apoia Dezenvolvimentu Emprezariál (IADE).

Grupu feto 34 iha RAEOA partisipa formasaun empoderamentu ekonomia ba jestaun organizasaun no finanseira. Imajen Tatoli/Abílio Elo Nini.

Nune’e mós Asosiasaun Feto Mudansa Ekonomia Família (AFMEF), ONG Binibu Faef Nome (BIFANO) no ONG Asosiasaun Futuru Foinsa’e Sustentabilidade (AFFOS), hosi fasilita formasaun ba grupu 34 mai hosi suku 18 no sub-rejiaun haat durante loron rua, kona-ba jestaun organizasaun no jestaun finanseira.

Prezidente Autoridade RAEOA, Arsénio Paixão Bano, informa, programa ne’e atu fasilita ba grupo feto sira hodi hasa’e ekonomia atu jere idak-idak nia grupu, nune’e bele garante sira-nia programa atu la’o ho susesu no sustentável.

Nune’e mós atu empodera grupu feto sira ho objetivu bele hasa’e kapasidade ekonomia família, nune’e sira iha opsaun hodi kontribui finanseira ba família hodi kombate violénsia doméstika.

“Formasaun ne’e ho objetivu prinsipál empodera feto sira, nune’e feto sira forte ba beibeik iha RAEOA, hahú hosi grupu 34 to’o tinan oin programa sei hanesan, tán ne’e mak formasaun ne’e importante tanba polítika autoridade lakohi husik feto vulnerável sira presiza partisipa iha dezenvolvimentu,” Prezidente Autoridade RAEOA, Arsénio Paixão Bano, informa ba Agência Tatoli, iha edifísiu ZEESM, Oé-Cusse, kinta ne’e.

Formadór atuál Koordenadór IADE RAEOA, Ermundo de Jesus Pereira, esplika, matéria ne’e aplika formasaun ne’e kona-ba jestaun organizasaun no jestaun negósiu ka fila-liman.

“Hafoin formasaun ne’e IADE iha ona planu ba futuru atu fasilita kapasitasaun ba sira-nia atividade kada grupu di’ak liután, nune’e bele garante ezekuzaun planu no programa ho kualidade,” nia promete.

Partisipante Nívia Martins hosi grupu Nenoton, suku Bobokase, agradese ba autoridade tanba fasilita formasaun ba grupu feto sira iha RAEOA, nune’e bele hasa’e sira-nia abilidade grupu feto sira.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here