Traballadór Kompañia Branditall hatun nesesidade bázika atu distribui ba família vulnerável iha Covalima. Imajen Tatoli/Celestina Teles.

COVALIMA, 23 dezembru 2021 (TATOLI)–Centro Logistíca Nacional (CLN) hamutuk ho Kompañia Branditall distribui nesesidade bázika ba família vulnerável sira iha munisípiu Covalima.

Prezidente Centro Logistíca Nacional (CLN), Servazio Cardoso Jesus da Silva, hateten programa CLN hamutuk ho Kompañia distribui nesesidade bázika ne’e, tanba iha fulan hirak liubá ne’e CLN sosa produtu lokál hosi komunidade, nune’e hodi fahe ba família vulnerável sira iha territóriu nasionál 

Nesesidade bázika hirak ne’e mak hanesan foos kilógrama 10, fore-mungu kilógrama tolu (3), fore-rai kilógrama tolu (3), fore-metan kilógrama tolu (3), batar kilograma tolu (3) iha hotu pakote nia laran.

“CLN distribui nesesidade bázika bazea ba lei Seguransa Alimentár hodi distribui ai-han ba família sira-ne’ebé kbiit laek tanba ha’u alvu ne’e ba sira,” Prezidente CLN, Servazio Cardoso Jesus da Silva, hateten ba jornalista sira iha Covalima, kinta ne’e. 

CLN distribui seguransa alimentár ne’e iha territóriu Timor-Leste ne’ebé sei halo distribuisaun bazea ba etapa, no iha munisípiu Covalima sei distribui hotu iha suku 30 bainhira iha reklamasaun ruma. 

“Programa ida-ne’e foin lalais ha’u loke konkursu públiku ne’ebé CLN gasta osan millaun $5-resin bazea dadus iha Covalima. Ami kumpre dadus hosi Ministériu Administrasaun Estatál (MAE), ne’ebé aprezenta ba nasionàl ami kumpre lista,” nia haktuir. 

Tanba, iha VIII Governu Konstituisionál nia programa fó prioridade ba família kbiit laek sira, sei kontinua distribui hodi sosa produtu lokál atu hamenus importasaun. 

Durante ne’e, CLN sosa produtu lokál iha munisípiu sira-ne’ebé mak prodús produtu lokál barak liu mak munisípiu Viqueque, Bobonaro no Covalima ladún iha tanba afeta hosi udan-been ladi’ak.

Administradór postu administrativu Suai Vila, Luzinho do Rego, reforsa dadus família vulnerável durante ne’e autoridade lokál mak rekolla hafoin submete ba autoridade munisipál, nune’e Governu bele fó apoiu ba ema vulnerável sira.

“Ita rekolla dadus família vulnerável oinsá mak bele hetan apoiu ba faze dahuluk, lista sira-ne’e   haruka no ajuda mai daudaun ona,” nia dehan. 

Ba faze dahuluk hosi postu administrativu Suai Vila, suku Camnasa, família vulnerável 15, suku Debos na’in-457, suku llabarai na’in-39 no suku rua mak la hetan apoiu ai-han.  

Bazea ba dadus, iha postu administrativu Maucatar sei distribui nesesidade bázika iha suku sira hanesan suku Belekasak Família vulnerável 147, suku Ogues 192, suku holpilat 267 no suku Matai hamutuk na’in-376.

Iha postu administrativu Fohorem, iha suku Fohorem família vulnerável hamutuk na’in-108, suku Laktos na’in-106, suku Dato Tolu na’in-100 no suku Dato Rua na’in-100.

Família vulnerável iha postu administrativu Tilomar na’in-300-resin, postu Fatumea na’in-100-resin, postu Fatululik kompostu hosi suku Fatululik no Taroman, postu administrativu Zumalai ho nia suku hamutuk ualu (8). 

Jornalista : Celestina Teles

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here