Konselleiru CI, Benevides Correia Barros, asina nota kooperasaun ho Reprezentante Rezidente UNDP iha Timor-Leste, Munkhtuya Altangerel, iha salaun CI, Kintal-boot, kinta (23/12). Imajen TATOLI/Francisco Sony

DILI, 23 dezembru 2021 (TATOLI)–Conselho de Imprensa (CI) ho Programa Nasaun Unida ba Dezenvolvimentu (UNDP, sigla inglés), kinta ne’e, asina akordu kooperasaun dezenvolvimentu mídia.

Diretór Ezekutivu CI, Rigoberto Monteiro, hateten, kooperasaun ne’e atu indika reportajen eleisaun durante siklu eleitorál, atu guia orgaun komunikasaun sira halo reportajen iha ámbitu prosesu eleisaun.

Diretór Ezekutivu CI, Rigoberto Monteiro. Imajen TATOLI/Francisco Sony

“Objetivu asina akordu koorenasaun ne’e atu hakerek mata-dalan ba reportajen eleisaun ba reporter no jornalista sira iha Timor-Leste,” Rigoberto Monteiro, informa iha salaun CI, Kintal-boot.

CI halo kooperasaun ho UNDP tanba hanesan orgaun reguladór iha kompeténsia atu dezenvolve mekanizmu autoregulasaun ba jornalista sira.

“Nune’e bele guia jornalista sira atu halo produtu jornalístiku ne’ebé sensível ba asuntu espesífiku hanesan ba jéneru, feto inkluzivu inklui asuntu eleisaun,” nia akresenta.

Konselleiru CI, Benevides Correia Barros, asina nota kooperasaun ho Reprezentante Rezidente UNDP iha Timor-Leste, Munkhtuya Altangerel, iha salaun CI, Kintal-boot, kinta (23/12). Imajen TATOLI/Francisco Sony

Timor-Leste sei iha Eleisaun Prezidensiál iha marsu 2022 no Eleisaun Jerál iha tinan 2023.

“Entaun importante atu prodús mata-dalan ida ba kobertura eleisaun, nune’e bele asegura no prevene konflitu ho rezultadu ne’ebé mosu bainhira iha prosesu kampaña no prosesu eleisaun nian,” nia hateten.

Mídia ninia kontribuisaun ba paz, maibé dala-ruma públika informasaun liuhosi rede sosiál mós bele kontribui ba konflitu.

“Deklarasaun sira ne’ebé polítiku sira halo ho ida-ne’ebé mídia divulga tenke prevene konflitu, hirak ne’e akontese iha prosesu kampaña tanba ita-nia divizaun polítiku boot tebes. Nune’e, ho akordu ne’e, ba oin ekipa sira sei serbisu atu implementa akordu, nune’e molok eleisaun bele finaliza ona mata-dalan,” Diretór Ezekutivu tenik.

Reprezentante Rezidente UNDP iha Timor-Leste, Munkhtuya Altangerel. Imajen TATOLI/Francisco Sony

Iha fatin hanesan, reprezentante UNDP iha Timor-Leste, Munkhtuya Altangerel, hateten, apoiu ne’ebé fó ba Governu Timor-Leste liuhosi CI, ho hanoin atu realiza eleisaun justu, transparante, inkluzivu no seguru ba COVID-19 no Eleisaun Prezidensiál.

“Nune’e iha ámbitu eleisaun bele fó sai informasaun justu no loloos atu asesu ba informasaun ne’e nu’udar elementu krítiku ba eleisaun ne’ebé susesu. Tanba mídia baibain ema hanaran pilár da-haat ba demokrasia hamutuk ho Governu, Parlamentu no setór judisiáriu,” nia dehan.

Hosi akordu ne’e, CI hetan apoiu finanseiru ho montante $50.000 atu implementa programa sira.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here