Prezidente Autoridade Munisípiu (PAM), Olívio 'Bou-Lesa' Freitas. Imajen Tatoli /Natalino Belo.

BAUCAU, 23 dezembru 2021 (TATOLI) – Prezidente Autoridade Munisípiu (PAM) Baucau, Olívio ‘Bou-Lesa’ Freitas, sei kompleta estrutura serbisu administrasaun iha 2022 nune’e kargu xefia sira hatudu prestasaun serbisu ho efikásia no efisiénsia.

Bou-Lesa lidera munisípiu Baucau besik tinan-ida ona halo ona mudansa administrasaun liuhosi reforma iha estrutura serbisu munisipál nian.

Nia fó ezemplu, mudansa ne’ebé halo hanesan diresaun finansa no administrasaun rekursu umanu ne’ebé antes ne’e ema na’in-ida muda ba ema na’in-rua.

Bou-Lesa konsidera mudansa refere halo tanba hakarak serbisu hotuhotu tenke efetivu nune’e kontribui ba atendimentu povu Baucau nian.

“Tinan foun mai ha’u sei kompleta tán xefe departamentu sira atu nune’e hotuhotu tenke xefia atu serbisu hotu efetivu liután,” PAM Baucau hateten iha Sentru Konvensaun Baucau (CCB, sigla Portugés), kinta ne’e.

Liuhosi orsamentu Programa Mão de Obra ba postu administrativu sira konsege halo manutensaun estrada iha vila laran, pinta jardín, limpeza jerál hanesan parte preparasaun selebra loron proklamasaun independénsia 28 novembru ne’ebé realiza ona iha Baucau.

Nune’e mós projetu konstrusaun moru merkadu, sede suku neen liuhosi Programa Dezenvolvimentu Intergradu Munisipál (PDIM) ne’ebé daudaun ne’e iha faze konstrusaun no tuir planu sei finaliza iha 2022.

Reabilitasaun mós ba rezidénsia antigu administradór tempu Indonézia nian inklui postu rua ne’ebé daudaun ne’e iha faze besik ba finalizasaun.

Seluk instala lampu iha dalan sidade Baucau vila (penerangan jalan) ne’ebé akordu ho eletrisidade Timor-Leste ne’ebé hahú lakan ona maske seidauk finaliza tanba empreza sei kompra ekipamentu iha estranjeiru.

Lampu refere tuir planu sei lakan hahú hosi Komponente Terrestre FALINTIL-FDTL, vila nova no antiga, estrada diresaun ba Viqueque to’o Buibau no vila antiga ba Caibada.

“Bainhira finaliza ona ami sei buka dalan atu reuni ho komponente hotuhotu iha Baucau hanesan loja, otél inklui restaurante bele operasionaliza to’o mínimu oras 10 kalan,” Bou-lesa esplika.

Eis administradór postu administrativu Baucau Vila ne’e rekoñese sei hasoru difikuldade iha parte orsamentu 2022 tanba projetu iha tinan oin liuhosi PDIM la aprova iha Komité Revizaun Orsamentu nível Polítika (KROP).

“Tinan oin kuaze projetu laiha tanba orsamentu ba munisípiu Baucau aloka de’it ba pakote fiskál ne’ebé hamutuk millaun $4.5, maske ami tenta propoin ba adisionál maibé laiha resposta,” PAM argumenta.

Nune’e, parte administrasaun munisípiu Baucau iha tinan 2022 sei aprosima ho parseiru dezenvolvementu sira liuhosi aprezentasaun difikuldade ne’ebé Baucau hasoru atubele hetan apoia iha konstrusaun infraestrutura ne’ebé ligada ba nesesidade povu.

Bou-lesa esplika, munisípiu Baucau iha akordaun ho parseiru dezenvolvementu sira hanesan UN Women ne’ebé sei implementa merkadu seguru inklui UNDP ne’ebé tuir planu sei konstrui estrada rúral iha suku Lawateri no  irrigasaun iha Venilale.

Entretantu Olívio ‘Bou-Lesa’ Freitas lidera munisípiu Baucau hodi troka António Guterres iha loron 12 fulan-janeiru 2021.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here