Baraka ne’ebé harii iha Cristo Rei Fatukama. Imajen/Espesiál.

DILI, 23 dezembru 2021 (TATOLI)—Autoridade Munisípiu Dili liuhosi Dirasaun Jestaun no Merkadu, kuarta (22/11) ne’e, halo operasaun konjunta hodi sobu baraka ida-ne’ebé negosiante balun konstrui iha Cristo Rei, Fatukama.

“Horisehik operasaun konjunta ne’ebé itania komandante eskuadra Becora hamutuk ho ami halo destroisaun ba baraka iha Cristo Rei. Hosi ne’e, sasán sira-ne’ebé iha hanesan besi aat ami lori ba fakar iha Tibar no nesesidade bázika sira ami ba fó hotu ba orfonatu Balide,” Xefe Departamentu Jestaun no Merkadu, Arthur Henriques, hateten ba Agência Tatoli iha nia knar fatin, Dili, kinta ne’e.

Tuir nia, baraka ne’ebé harii iha Cristo Rei ne’e ilegál tanba área ne’e protejida no bandu labele faan, maibé komunidade nafatin la rona no halo tan uma iha fatin ne’e entaun foti desizaun tenke destroi fatin ne’e.

“Durante ne’e ami halo ona aproximasaun durante fulan rua nia laran, hanesan ko’alia direta no liuhosi telefone maibé ema ne’e la kumpre regras ne’ebé ami fó sai. Entaun, ami foti desizaun destroi,” nia informa.

Entretantu, negosiante ambulante ne’ebé harii baraka iha Cristo Rei ne’e hala’o atividade negósiu hanesan tunu sate, faan nesesidade bázika inklui faan nú-laloir.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here