Negosiante ambulante kumpre orientasaun Governu faan sasán iha loja nia tatis Colmera la’ós faan iha trotoar leten. Imajen Tatoli/Nelia Fernandes.

DILI, 23 dezembru 2021 (TATOLI)—Xefe Departamentu Jestaun no Merkadu, Arthur Henriques, hateten Governu liuhosi Autoridade Munisípiu Dili kontinua bandu negósiante ambulante sira-ne’ebé faan sasán iha troroár leten, tanba bele kria engrafamentu ba ema.

“Ita kontinua bandu negósiante ambulante sira-ne’ebé fa’an sasán iha trotoár leten, tanba, tuir Dekretu-Lei númeru 33 ne’e proibi, katak labele faan sasán iha trotoár leten no área ne’ebé movimentu kareta nian, tanba bele kria ingrafamentu ba ema,” Arthur Henriques hateten ba Agência Tatoli, iha nia knar fatin, kinta ne’e.

Nu’udar Xefe Departamentu foun, agora daudaun nia halo aproximasaun ho negosiante sira hodi fó hanoin maibé bainhira sira kontinua mantein faan iha trotoar leten mak obrigatóriamente tenke foti medida.

“Ita labele husik de’it sidade Dili ne’e sai fali fatin merkadu públiku,” nia dehan.

Durante ne’e jestaun no merkadu halo aproximasaun inklui halo avizu ba negósiante ambulante sira, atu labele halo negósiu ka faan iha trotoár leten maibé komunidade sira mak ulun to’os.

“Bainhira ami ba aviza haruka sira muda tiha, maibé liutiha tuku 20h00 kalan negosiante sira komesa nakar hodi konsentra faan fali iha trotoar leten. Ami foti medida prende sasán maibé hanesan de’it tanba bainhira prende tiha sasán sira kontinua faan nafatin,” nia hateten.

Tanba ne’e, iha tinan oin (2022), Departamentu Jestaun no Merkadu iha planu oinsá atu bele diminui vendedór ambulante sira-ne’ebé faan sasán arbiru iha estrada públiku no trotoar leten ne’e, sei atua no haruka muda sai negosiánte ambulante ne’ebé faan sasán iha trotoar leten.

“Ba sira-ne’ebé ulun to’os ami prende sasán hanesan modo-tahan no ikan sira, nune’e ami sei lori no fó ba orfonatu sira liu-liu madre no padre sira-ne’ebé haki’ak labarik oan-ki’ak sira,” nia dehan.

Tuir observasaun jornalista Agência Tatoli nota iha terrenu katak daudaun ne’e negósiante ambulante sira-ne’ebé faan sasán iha Colmera-Dili ne’e, kumpre no tuir orientasaun hosi Governu liuhosi Jestaun no Merkadu hodi faan sasán iha fatin loos.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here