AIFAESA divulga informasaun ba jestór kompaña sira kona-ba lejislasaun sira ne'ebé regula atividade komersiu iha teritoriu Timor-Leste. Iha salaun Delta Nova, kinta (23/12). Imajent Tatoli/Francisco Sony

DILI, 23 dezembru 2021 (TATOLI)-Autoridade Inspesaun no Fiskalizasaun Atividade Ekonómia Sanitária no Alimentár, Institutu Públiku (AIFAESA, I.P) realiza semináriu kona-ba divulga papél AIFAESA no instrutumentu legál ne’ebé regula atividade ekonómika iha Timor-Leste.

Sub-Inspetór Jerál AIFAESA, I.P, Dionísio Neto da Silva hateten, objetivu hosi semináriu refere divulga informasaun operadór ekonómiku sira oinsá sira bele koñese didi’ak kompeténsia instituisaun hotu-hotu ne’ebé iha ligasaun ho atividade kontrolu alimentár.

“Tanba ita-nia operadór ekonómia sira ne’ebé halo negósiu sira presiza tebes atu asesu ba iha lei ka regulamentu ne’ebé regula atividade iha TL, hanesan sira atu halo atividade negósiu ruma tenke rejistu iha Servisu Rejistrasaun no Verifikasaun Emprezariál Institutu Públiku (SERVE, I.P),” Dionisio Neto da Silva ba Agência Tatoli iha Delta Nova, Dili, kinta ne’e.

Tanba regulamentu ne’ebé iha kualkér empreza ruma atu halo negósiu iha TL nia tenke iha lisensa negósiu.

“Tanba ne’e ita konvida mós SERVE ne’ebé na’in ba prodús lisensa sira sei fahe mós prosesu atu hetan lisensa ba iha negósiu,” nia dehan.

Tanba AIFAESA nia misaun ne’ebé, iha mak proteje konsumidór no promove konkorénsia leál entre operadór ekonómiku katak oinsá mak operadór ekonómiku sira atu konkorre hodi komprimentu ba lei sira ne’ebé regula atividade ekonómika.

“Nune’e ita nafatin halo inspesaun fiskalizasaun aumezmu tempu ita fahe nafatin informasaun ba operadór ekonómia sira kona-ba dekretu lei númeru 26/2016 29 juñu ne’ebé regula atividade”.

“Bainhira sira kumprimentu ona ba iha lei ne’ebé regula atividade ekonómika hanoin buat ida infrasaun ne’e sei menus, tanba operadór ekonómiku sira konsiente ona ba lei sei laiha tan ona infrasaun tanba infrasaun ne’e mosu ne’e hosi inkomprimentu ba lei ne’ebé regula kona-ba atividade ekonómika,” nia heteten.

Tanba durante AIFAESA halo deteta operadór ekonomia sira ne’ebé halo infrasaun mak hanesan, laiha lisensa hamutuk 284, lisensa mate 225, atividade la tuir lisensa 320, atividade la tuir enderesu 93.

Iha fatin hanesan, Diretór Ezekutivu SERVE, I.P, Florêncio Sanches hateten, atividade divulga informasaun papél AIFAESA ba operadór ekonomia-sira ne’e di’ak tebes tanba bele involve hotu SERVE atu haree ba iha ninia legalidade ba emprezáriu sira ne’ebé mak agora daudaun AIFAESA halo fiskalizasaun.

Tanba AIFAESA haree nia atividade no SERVE haree ba nia legalidade.

“Tanba ko’alia kona-ba legalidade, bainhira emprezáriu ekonomia sira hetan ona legalidade sira bele hala’o atividade tanba bainhira hala’o ona ativdade maibé legalidade laiha mós labele,” ezekutivu ne’e hateten.

Entaun, tuir nia, SERVE nia papél bá semináriu ne’e importante tebes, nune’e fanu fali emprezáriu sira katak halo atividade ekonomia iha teritériu tomak tenke rejistu uluk identidade iha SERVE mak hafoin hala’o atividade.

“Tanba bainhira rejistu hotu mak foin hetan aplika ba iha sira-nia lisensiamentu atividade nian, nune’e kada entidade ne’ebé rejistu ona iha SERVE bele hala’o nia atividade SERVE entrega ba iha ministériu relevante sira inklui AIFAESA nune’e bele halo kontrolu ne’ebé di’ak nune’e labele hamosu infrasaun,” Floréncio hateten.

Tanba ne’e husu ba emprezáriu sira ne’ebé daudaun hala’o ona atividade maibé seidauk halo rejistu iha SERVE, tenke rejistu tanba la rejistu sei hetan multa $5.000.

“SERVE rasik to’o agora rejistu ona emprezáriu sira ne’ebé hakarak kumpri duni lejislasaun TL hamutuk 35.500, maibé braka mós seidauk halo rejistu tanba ne’e husu hotu-hotu tenke halo rejistu,” nia dehan.

Jornalista : Arminda Fonseca

Editór : Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here