Reitór UNTL, João Soares Martins no Koordenadór Emerjénsia WFP, Ashley James Rogers, asina nota entendimentu, iha salaun Kampus sentrál UNTL, kuarta (22/12). Imajen TATOLI/Egas Cristóvão

DILI, 22 dezembru 2021 (TATOLI)–Universidade Nasionál Timor-Lorosa’e (UNTL) kolabora ho Programa Ai-han Mundiál (WFP, sigla inglés) atu habelar informasaun ba komunidade iha baze kona-ba problema má nutrisaun.

Reitór UNTL, João Soares Martins, hateten, kada tinan estudante sira sempre hala’o programa estájiu iha komunidade nia le’et no programa WFP hanesan modalidade ba estudante sira atu bele habelar liután informasaun ba komunidade iha baze.

Reitór UNTL, João Soares Martins. Imajen TATOLI/Egas Cristóvão

“Ita bele tau programa ne’e hanesan modalidade ida hodi orienta estudante sira bele foti nu’udar tema monografia ba sira-nia estudu inklui mós bele sai mós projetu peskiza ida ba estudante finalista,” Reitór relata iha seremónia asina akordu entre UNTL no WFP, iha Kampus UNTL, kuarta ne’e.

Entendimentu ne’e atu hasa’e kapasidade estudante sira atubele envolve liután iha programa peskiza konjunta iha área nutrisaun no merenda eskolár.

Notísia relevante: Programa merenda eskolár deskonsentra ona ba munisípiu sira

Entidade hosi parte rua hasai foto hamutuk hafoin asina nota entendimentu, iha salaun Kampus sentrál UNTL, kuarta (22/12). Imajen TATOLI/Egas Cristóvão

Tuir Reitór maski parte rua asina ona akordu, maibé la signifika universidade atu sai fali benefisiáriu ba merenda eskolár, maibe programa ne’e integra ona iha universidade atu hetan kolaborasaun hodi kapasita estudante sira bele iha koñesimentu liután kona-ba valór nutrisaun.

Akordu ne’e nu’udar kontinuasaun hosi akordu ne’ebé parte rua halo ona, ba durasaun tinan lima no bainhira termina tenke renova, tanba ne’e permite kooperasaun foun kontinua nafatin iha futuru.

Koordenadór Emerjénsia WFP, Ashley James Rogers. Imajen TATOLI/Egas Cristóvão

Iha biban hanesan, Koordenadór Emerjénsia WFP, Ashley James Rogers, hateten, akordu ne’e atu serbisu hamutuk iha programa peskiza, seguransa alimentár, servisu ekstensionista inklui mós programa merenda eskolár.

“Ita kria akordu kona-ba implementasaun program ne’e tanba UNTL nu’udar universidade ida, sira iha ema ne’ebé hatene kona-ba área sira ne’e hodi bele hala’o programa sira,” nia tenik.

Jornalista : Tomé Amado

Editora     : Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here