Kondisaun atuál EBF Bucoli ne'ebé hetan estragu hafoin akontese udan, anin akompanã ho rai lakan iha tersa kalan . Imajen Tatoli /Natalino Belo.

BAUCAU, 22 dezembru 2021 (TATOLI)–Uma hamutuk 81 iha suku Bucoli no Eskola Bázika Filiál (EBF) Bucoli, postu administrativu Baucau Vila, munisípiu Baucau, hetan estragus totál tanba impaktu hosi udan, anin no akompaña ho rai-lakan iha loron tersa kalan.

Udan, anin no akompaña ho rai-lakan ne’ebé akontese iha tersa kalan, hahú ho intensidade boot iha oras 22:00-resin to’o 00:00 rezulta anin sobu komunidade nia uma inklui EBF Bucoli. Iha dezastre naturál ne’e vítima sira halai sai hosi uma hodi fatin seguru no oras ne’e vítima sira hela viziñu balun ne’ebé besik tanba kondisaun iha ameasa laran.

Dezastre naturál ne’ebé akontese iha suku Bucoli, Baucau Vila, munisípiu Baucau. Imajen Tatoli/Natalino Belo.

Vítima Cesar Gonçalves da Silva hosi aldeia Luliheni, suku Bucoli haktuir, rai-lakan ne’e tarutu derrepente rezulta ai-tohar akompanã kedas anin-boot no udan sobu kalen to’o estraga sasán eletrónika hanesan televizaun no sasán sira seluk.

Uma refere hamutuk xefe-família haat ho totál membru-família na’in-15, inklui labarik nurak na’in-tolu no idozu na’in-ida tenke asegura ba viziñu nia uma.

“Horikalan hafoin akontesimentu, família uma-laran inklui bebé na’in-tolu ho avo tenke ba deskansa fali iha viziñu nia uma tanba kondisaun uma la permite atu toba,” Cesar hateten iha ninia rezidénsia Luliheni, kuarta ne’e.

Dezastre naturál ne’ebé akontese iha suku Bucoli, Baucau Vila, munisípiu Baucau. Imajen Tatoli/Natalino Belo.

Nune’e mós Vítima Nazário Ximenes hosi aldeia Luliheni, informa, bainhira dezastre naturál ne’e akontese nia parte hamutuk ho família deskansa hela iha baraka tanba uma hetan inséndiu iha loron 10 outubru liubá.

“Ami na’in-lima, oan na’in-tolu, ha’u ho ferik-oan, la rezulta kanek maibé sasán mak la salva,” Nazário akresenta.

Xefe suku Bucoli, Terezinha dos Reis, informa ona akontesimentu ne’e ba parte kompetente inklui konsellu suku no komunidade atu tún direta ajuda malu relasiona ho dezastre naturál ne’e.

“Ha’u husu apoia nesesidade urjentemente tanba agora daudaun komunidade nia dapur laiha tanba estraga totál. Tanba ne’e rekomenda ba Governu haree ho matan atu analiza, fó ami simu,” Terezinha informa.

Xefe suku Bucoli ne’e husu  Governu apoia ho karáter urjénsia kona-ba liuliu fatin atu toba inklui hahán tanba uma-ne’ebé estraga kategoria grave.

Daudaun ne’e, parte Servisu Munisipál Protesaun Sivíl no Dezastre Naturál Baucau akompanã Admistradór Postu Administrativu Baucau Vila, autoridade suku, CVTL hahú tún observa situasaun no rekolla dadus vítima dezastre naturál ne’ebé akontese iha Bucoli.

Hosi observasaun Agência TATOLI nota, akontesimentu dezastre naturál refere rezulta riin eletrisidade estraga karreta kijang ida, EBF Bucoli hetan estragus totál, vítima na’in-rua kanek, ai-tohar inklui uma barak mak estraga.

Dezastre naturál ne’ebé akontese iha suku Bucoli, Baucau Vila, munisípiu Baucau. Imajen Tatoli/Natalino Belo.

Tuir dadus hosi autoridade suku, uma 81 kompostu hosi aldeia haat hanesan Uaisemu, Makadae de Baixo, Luliheni, Lekiloiuatu no Aubaca.

Entretantu aldeia Luliheni hamutuk totál uma-kain 177 hosi populasaun 783, Makadae de Baixo uma-kain 155 ho populasaun 645 no Uaisemun uma-kain 196 ho populasaun 932.

Suku Bucoli iha aldeia neen hanesan Aubaca, Makadae de Cima, Luliheni, Makadae de Baixo, Lekiloiuatu no Uaisemu, totál populasaun 3.300-resin hosi uma-kain 736.

EBF Bucoli aat totál

Koordenadór Eskola Bázika Filiál (EBF) Bucoli, Leonardo Martinho Lopes, informa dezastre naturál refere rezulta kondisaun edifisiu rua komposta hosi sala eskola hitu estragu totál tanba kalen anin sobu.

Kondisaun atuál EBF Bucoli ne’ebé hetan estragu hafoin akontese udan, anin akompanã ho rai lakan iha tersa kalan . Imajen Tatoli /Natalino Belo.

“Anin estraga edifísiu rua no sala-aula hitu, kalen sobu, udan akompanã esraga nesesidade eskola nian totál,” Koordenador EBF Bucoli hateten iha Bucoli.

Leonardo rasik sei koordena ho Servisu Edukasaun Munisipál Baucau atu nune’e bele foti medida urjénsia kona-ba infraestrutura eskola ne’ebé hetan estragus kauza hosi dezastre naturál ne’ebé akontese iha tersa kalan.

“Ha’u sei halo relatóriu ba edukasaun munisípiu no nasionál atu tau matan ba kondisaun eskola atu nune’e hahú janeiru 2022 estudante bele utiliza ba prosesu aprendizajem,” Leonardo akresenta.

Totál estudante iha EBF Bucoli rasik hamutuk 421 hosi primeiru to’o terseiru siklu ho totál profesór 14 komposta hosi permanente na’in-sia no kontratadu na’in-lima.

Jornalista         : Natalino Belo

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here