Sekertáriu Estadu Juventude no Desportu (SEJD), Abrão Saldanha. Imajen Tatoli/Antonio Dasiparu

DILI, 22 dezembru 2021 (TATOLI)– Sekretáriu Estadu Juventude no Desportu (SEJD), Abrão Saldanha, informa, iha tinan ne’e, progresu serbisu SEJD la’o di’ak tanba liuhosi programa estímulu empreendedorizmu sosiál juventude konsege apoia ona joven kreativu na’in-435, hosi suku 283 iha territóriu nasionál.

“Tinan ida ne’e, ita nia serbisu la’o másimu tanba ita konsege apoia grupu joven hamutuk 435,  iha suku hamutuk 283. Apoia ne’e liuhosi programa istímulu empreendedorizmu sosiál, ida ne’e mak progresu ne’ebé ita hetan iha tempu difisil nia laran. Joven sira hetan hela apoia ba sira nia inisiativa iha área hanesan agrikultura, pekuaria, peska, turizmu no balun iha konservasaun ambientál,” SEJD Abrão, hateten ba Agência TATOLI iha nia knaar fatin-Licidere, tersa ne’e.

Notísia relevante: SEJD lansa programa nasionál estímulu empreendedorizmu

Programa ne’e realiza tanba kompromisu VIII Governu Konstitusionál ba joven sira atu lori ba hala’o atividade produtivu hodi kontribui ba dezenvolvimentu ekonómiku no kontribui mós ba prosesu rekuperasaun ekonomia ne’ebé Govenru hala’o hela iha territóriu nasionál.

Alende ne’e, SEJD mós hala’o formasaun ba juventude iha munisípiu ualu atu serbisu iha área rurál hodi kontribui ba dezenvolvimentu suku.

“Ita mós konsege forma joven eleitu suku oinsa atu fó formasaun ba-sira iha baze atu sira bele hare didiak servisu juventude nian, iha munisipiu ualu hanesan, Ermera, Aileu, Manufahi, Covalima, Ainaro, Liquiça, Bobonaro no Viqueque kada suku ema na’in rua,” nia dehan.

Kona-ba área Parlamentu Foinsa’e, SEJD konsege realiza formasaun ba joven hamutuk 130, atu sai lideransa ne’ebé di’ak, treinamentu halo diskusaun públiku ba debate no analiza programa.

“Ita konsege loke formasaun oi-oin, hanesan iha kada munisípiu tau joven na’in rua atu aprende kona-ba IT nian iha nivél graphic designer agora sira konsege hatudu ona rezultadu di’ak iha munisipiu ida-idak inklui formasaun ospitalidade ita mós forma ema iha ne’ebá no atividade barak mak ita hala’o ona,” SEJD ne’e informa.  

Nivél polítika

Nune’e, iha nivél polítika  hahú dezenvolve planu asaun anuál ba joventude liu-liu kona-ba problema arte marsiál ne’ebé konsege rezolve no rekomenda ba rejistu iha notariadu.

“Ita esforsu hela kona-ba artemarsial tolu ne’ebé antes ne’e problematiku ita konsege lori sira ba rejistu iha notariadu,” nia afirma.

Alende ne’e, promove joven sira iha area peskiza kona-ba tendensia joven sira nia hakarak atu ba ne’ebé liu-liu ba referensia joven sira nian oinsa atu bele promove sira liu hosi sira bele iha istoria inspiradór joven sira nian.

Área Desportu

SEJD konsege realiza ho susesu eventu desportu komunitáriu ne’ebé hala’o iha munisipiu hotu, kampionatu nasionál ba federasaun sira no seluk tan.

Jogador Ramelau FC halo selebrasaun hafoin simu premiu husi SEJD nudr kampiaun ba Futsal Praliga 2020/2021 iha kampu Futsal Fatuhada, sesta 26/11/2021. Imajen Tatoli/Antonio Goncalves

“Desportu barak mak susesu iha 2021, ita konsege realiza kampionatu barak, jogu komunitariu sira iha Timor – Leste, liga nasionál mós konsege realiza fila-fali. Ita mós konsege partisipa iha jogu internasionál hanesan Olympic Games. Ita mós hahú esforsu atu dezenvolve futeból juvenil no ita mós halo levantamentu dadus ba fedarasaun desportu hotu no atu define modalidade prioritariu sira atu investe iha tinan oin,” nia informa.

Ho programa hirak ne’ebé SEJD hala’o iha 2021 ho gastu orsamentu  millaun $7-resin.

“Dezafiu ne’ebé ita hasoru mak pandemia Covid-19 ne’ebé ita hasoru, problema mak ita realiza atividade sira la tuir nia tempu ne’ebé mak iha,” nia haktuir.

Alende ne’e, SEJD mós hasoru dezafiu mak rekursu umanu ne’ebé la sufisiente atu hala’o servisu ho másimu iha nivél nasionál no munisípiu.

“Ita nia ema la sufisiente atu halao servisu, ho nune’e ami planu ona ba tinan oin sei rekruta tan funsionáriu balun atu koloka iha nivél nasionál munisípiu no postu administrativu sira,” nia haklaken.

Kona-ba, OJE 2021 ne’ebé aloka ba SEJD ho mantante $9.476.147, maibé daudaun ezekuta ona kuaje atinje tarjetu, iha kapitál menor, saláriu no vesimentu no transfeénsia públiku.

Enkuantu, Orsamentu Jerál Estadu 2022 ba SEJD ho montante $6,583.318, ne’ebé aloka ba saláriu bensimentu $638.496, bens servisu $1,402.400, transferénsia públika $3.562.279, kapitál menór $600.000 no kapitál dezenvolvimentu $380.143, no orsamentu ne’e sei finansia ba programa rua (2), sub-programa lima (5) no atividade (19).

Notísia Relevante: OJE 2022 millaun $6,5 ba SEJD aprovadu iha espesialidade

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here