DILI, 22 dezembru 2021 (TATOLI)–Sekretaria Estadu Kooperativa (SEKoop) enserra semináriu no formasaun ba dirijente Organizadór, Motivadór, no Mobilizadór (OMM) sira hosi munisípiu, ho objetivu atualiza no avalia serbisu iha terrenu ne’ebé la’o durante ne’e.
Atividade ne’e hala’o hahú hosi loron 20 to’o 22 dezembru 2021.
Biban ne’e, Sekretáriu Estadu Kooperativa, Elizário Ferreira, enkoraja dirijente OMM atu lori hanoin inovativu no produtivu ba sosiedade, nune’e eduka hola parte iha vida kooperativa.
“Ita halo avaliasaun filafali ba dirijente OMM sira-nia progresu serbisu no dezafiu durante tinan ida, nune’e prepara-an di’ak liután ba tinan foun no kontinua asegura serbisu sira hodi fó benefísiu ba povu no mobiliza hola parte iha vida kooperativa,” Sekretáriu Estadu hateten iha salaun Katedrál Saõ José, Villa verde, kuarta ne’e.
Notísia relevante: SEKoop hakarak promove atividade Kooperativa Valusere hodi atrai vizitante
Tuir governante ne’e, dezafiu ne’ebé hasoru iha vida kooperativa mak menus koñesimentu lideransa, tanba dirijente sira ladún hatene funsaun no fiskál sira ladún hatene kompeténsia halo fiskalizasaun ho di’ak.
“Tanba ne’e, ita asegura kontinua fó formasaun ba dirijente, fiskál, inklui funsionáriu formadór sira hodi projete formasaun ho di’ak, nune’e bele nafatin akompaña no fasilita formasaun ba dirijente kooperativa sira hodi funsiona ho di’ak iha territóriu laran tomak,” nia akresenta.
Durante tinan tinan-2021 nia-laran, progresu dezenvolvimentu kooperativa la’o di’ak, tanba iha tinan-2020, kooperativa kréditu hamutuk 91, maibé iha tinan ida-ne’e kooperativa kréditu hamutuk 114.
Nune’e, iha tinan-2020 kooperativa produsaun hamutuk 69, maibé iha tinan-2021, iha 169 mak funsiona ho di’ak.
Tanba ne’e, liuhosi semináriu ne’e, bainhira iha rekomendasaun ruma, sei tau iha planu anuál ba tinan-2022, atu nune’e bele hala’o ho efikásia no efisiente hodi atinje objetivu ne’ebé define ona.
Rekomendasaun ne’ebé SEKoop rekomenda ba dirijente sira mak akompaña kooperativa, monitoriza, no supervisiona nafatin grupu kooperativa sira, nune’e bele fusiona duni tuir prinsípiu no valór kooperativa.
“Husu akompaña nafatin ita-nia kooperativa sira atu asegura estabilidade no sustentabilidade institusionál kooperativa, estabilidade finanseira no ekonómiku kooperativa. Ida-ne’e mak orientasaun no papél hosi OMM sira,” Sekretáriu Estadu hameno.
Partisipante iha eventu ne’e mai hosi postu administrativu 65, ne’ebé kada postu reprezenta hosi ema na’in-rua, nune’e hamutuk ema na’in-130 mak partisipa inklui pesoál hosi movimentu kooperativa hamutuk 70-resin.
Jornalista : Arminda Fonseca
Editora : Julia Chatarina
