AJTL realiza semináriu kona-ba independensia editoriál iha kontextu elisaun no feto karreira. Iha salaun Otél Luz Clarita, kuarta (22/12). Imajen Tatoli/Francisco Sony.

DILI, 22 dezembru 2021 (TATOLI)—Xefe Departamentu Formasaun Sekretária Estadu Igualdade no Inkluzusaun (SEII), José de Carvalho, informa SEII halo kolaborasaun ho partidu polítiku sira oinsá atu involve feto iha estrutura partidu polítika.

“Ita halo kolaborasaun ho partidu polítiku sira, liuhosi enkontru reguár no fó hanoin ba  lideransa partidu polítiku sira atu oinsá iha estrutura partidu ne’e, sira presiza involve mós feto sira. La’ós envolve sira iha ne’ebá atu ba partisipa de’it maibé fó hanoin ba lideransa partidu sira atu tau mós orsamentu ba iha kada partidu atu kapasita inan-feton sira-ne’ebé mak hola parte iha estutura partidu. La’ós sira ba hola parte oinsá atu haruka sira ba-mai de’it,” José de Carvalho hateten bainhira sai oradór iha semináriu nasionál ho tema “Independénsia editoriál iha kontestu eleisaun no feto iha karreira” hodi komemora aniversáriu AJTL ba dala-22 ne’ebé realiza iha Salaun Hotel Luz Clarita, Díli, kuarta ne’e.

SEII fó hanoin mós ba partidu polítiku sira bainhira iha kandidatura feto iha partidu laran, hanesan atu tuur iha parlamentu ka ba iha nível foti desizaun ruma tenke fó mós oportunidade ba feto sira.

Tanba, nia dehan, dala barak iha líderansa partidu polítiku sira balun iha ego, entaun dala ruma fó konfiansa barak liu ba mane hodi la fó importánsia ba feto sira tuur iha estrutura partidu nian.

“Meu ne’ebé ami halo mak konvoka enkontru regulár ho partidu polítika sira, liu-liu lideransa partidu sira atu fanu no fó hanoin nafatin ba sira, atu nune’e bainhira sirania partidu hetan asentu iha parlamentu nasionál karik, sira tenke fó mós oportunidade ba feto sira sai reprezenta povu iha PN,” nia dehan.

SEII mós nafatin kolabora ho partidu polítiku sira hala’o formasaun oinsá ko’alia konaba líderansa, jestaun, akuntabilidade inklui preparasaun atu ko’alia iha públiku no atu haree konaba knar parlamentu nian.

“SEII la servisu mesak maibé servisu hamutuk ho IRI, ADN, INAP no NGO sira no ami ho parseriu sira-ne’e mak durante ne’e sempre fó formasaun ba membru partidu polítiku sira,” nia informa.

Programa seluk ne’ebé durante ne’e SEII hala’o mak SEII hamutuk ho ONG nasionál no internasionál inklui Parlamentu Nasionál, liu-liu hosi Grupu Mulher Parlamentar TimorLeste (GMPTL) hodi halo formasaun.

Iha tinan 2022 no 2023 ne’e bolu tinan eleisaun ka tinan ba polítika nian, tanba ne’e SEII no GMPTL hamosu kuadru estratéjia ida-ne’ebé lansa direta hosi Sekretária Estadu Igualdade no Inkluzaun hamutuk ho Prezidente GMPTL, liña ministériál, inklui ONG nasionál no internasinál sira hotu.

“Kuadru estratéjia ne’e, ita hafoun filafali aumenta tan iha temátiku ida ko’alia konaba desentralizasaun munisipál nian. Karik, bainhira mosu iha eleisaun ba iha desentralisaun oinsá papél no inan-feton sira iha munisípiu saida mak sira atu hola parte iha ne’eba,” xefe formasaun ne’e reafirma.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here