Ai-han lokál hosi empreza Matrrozec Gare Unip Lda. Imajen/FB

DILI, 22 dezembru 2021 (TATOLI)— Tuir dadus estatístika Ministériu Saúde, liuhosi Diresaun Nasionál Saúde Públiku, iha tinan 2016 to’o 2020, resjita kazu hahan lanu ema hamutuk 293.

“Kazu ema ne’ebé mak hahan lanu na’in-293, no laiha mate  tanba maioria rekupera hafoin ekipa saúde tuun ba halo intervensaun,’’ Diretór Saúde Publika, Ministériu Saúde, Carlito Correia Freitas, hateten ba jornalista sira bainhira partisipa serimonia kona-ba ai-han seguru ba ema hotu bele saudavél iha loron aban, iha salaun Delta nova ohin.

Notísia relevante: MS Fó Orientasaun Ba Jestór Ótel Sira Kona-ba Xave 5 Ai-han Seguru

MS observa kazu hahan lanu ema ne’e maioria oin-halai, munta no diareia, maibé pesoál saúde halo intervesaun liuhosi tratamentu saúde konsege rekupera fali.

Nune’e, Governu liuhosi entidade relevante sira hahú koopera atu foku ba seguransa ai-han liuliu hahan sira tenke seguru ba ema nia saúde liuliu labarik ki’ik no inan isin-rua, bainhira konsumu.

Governu liuhosi Ministériu Saúde, Ministériu Agrikultura no Autoridade Inspesaun Fiskalizasaun Atividade Ekonómia Sanitária (AIFAESA) sei reforsa iha kontrolu ba ai-han atu garante sidaudaun saudavél.

Notísia relevante: OMS Rekomenda Timor-Leste Presiza Tau Atensaun ba Ai-han Seguru

Tanba ne’e, MS rekoemnda ba jestór ótel no restaurante sira iha kapitál Dili no iha munisípiu sira atu garante ai-han seguru ba ema nia saúde, liuhosi prepara hahan ne’ebé mak moos, seprasaun ba hahan task no matak, kondisaun saneamentu ne’ebé di’ak, bele rai haha iha temperature ne’ebé tuir kritéria saúde no utuliza bee ne’ebé seguru no hili hahan ne’ebé fresku no hahan sira ne’e lalika liu prazu.

“Ita kontinua partilla informasaun no kontrola sira ne’ebé prepara hahan iha restaurante no ótel sira ho diak, maibé ita haree vendedor ki’ik faan hahan iha dalan ninin sira ne’e sai riksu ida ba iha seguransa ai-han,” nia karesenta.

Iha fatin hanesan, Diretora Nasionál Veterinária, MAP, Joanita Bendita Jong, informa, parte MAP liuhosi kontinua esforsu asegura ai-han seguru liuliu naan sira ne’ebé ema konsumu.

“Ami ho AIFAESA, Ministériu Saúde no Organizasaun Mundiál Saúde no liña ministeriál sira kontinua kontrola kualidade ai-han liuliu hahan importasaun,” nia afirma.

Notísia relevante: GASC-MS realiza diálogu nasionál konsultasaun seguransa ai-han

Jornalista  : Felicidade Ximenes

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here