Prezidente KFP, Faustino Cardoso. Imajen Egas Cristovão.

DILI, 22 dezembru 2021 (TATOLI)—Komisaun Funsaun Públika (KFP), iha inisíu fulan janeiru to’o dezembru tinan ne’e rejista hodi prosesa kazu asaun indixiplinár hosi funsionáriu públiku hamutuk 100-resin ne’ebé mai hosi instituisaun Estadu sira.

Notísia Relevante: KFP-liña ministeriál avalia progressu servisu jestaun rekursu umanu nian

“Komisaun Funsaun Públika iha komisáriu ida ho protofóliu haree kona-ba prosesu indixiplinár ninian ne’ebé tinan ne’e simu kazu 100-resin mak tama hodi prosesa tuir dalan ne’ebé iha,” Prezidente KFP, Faustino Cardoso, hateten ba jornalista sira iha edifísiu Ministéiru Finansa, Aitarak Laran, Dili, kuarta ne’e.

Prezidente KFP ne’e la esplika detallu kona-ba kazu hira mak konklui ona prosesu no hira mak kontinua pendente tanba nia parte la lembra númeru ne’ebé fiksu, maibé iha kazu balun mak konklui ona no balun seidauk.

Nia relata, kazu númeru aas mak la tama ka abandona servisu no númeru naton mak má-administrasaun, pekulatu uzu hanesan uza karreta Estadu iha oras la apropriadu.

Kazu seluk liga ba integridade funsaun públika hanesan asedu seksuál, responsabilidade familiár no kazu sira seluk maibé kompeténsia KFP atu haree ba kazu prosesu indixiplinár administrativa ninian.

Kona-ba prosesu krime no sivíl hanesan pekulatu ho sira seluk, KFP sempre enkamiña ba Ministéiru Públiku (MP) mak iha kompeténsia hodi ba iha tribunál.

“Normalmente KFP foti asaun dixiplinár ho nia sansaun oioin hanesan represaun eskrita, suspensaun, in-atividade no todan liu mak demisaun,” nia hateten.

Durante iha prosesu ne’e parte sira iha direitu tomak atu halo auto-defeza ba akuzasaun sira ne’ebé sira hasoru.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here